28 February 2020

News Flash

नागपूर मनपात तुकाराम मुंढेंची धडाक्यात एन्ट्री; पहिल्याच दिवशी घेतला अधिकाऱ्यांचा वर्ग

पहिल्याच दिवशी त्यांनी अधिकाऱ्यांची एक मिटींगही घेतली

संग्रहित छायाचित्र

नागपूर महानगरपालिकेचे आयुक्त तुकाराम मुंढे यांनी आज (मंगळवार) आपल्या पदाचा कार्यभार स्वीकारला. पदाचा कार्यभार स्वीकारताच तुकाराम मुंढे हे अ‍ॅक्शन मोडमध्ये आल्याचं पहायला मिळालं. काही दिवसांपूर्वीच राज्य सरकारनं त्यांची नागपूर महानगरपालिकेच्या आयुक्तपदी बदली केली होती.

कार्यभार स्वीकारताच तुकाराम मुंढेंनी आपल्या कामाला सुरूवात केल्याचं पहायला मिळालं. त्यांनी पहिल्याच दिवशी अधिकाऱ्यांसमवेत ५० मिनिटांची एक मिटींगही घेतली. तसंच कार्यालयात उशिरा पोहोचणाऱ्या कर्मचाऱ्यांना खडेबोल सुनावल्याची माहिती मिळाली आहे. मिटींगदरम्यान, कोणत्याही अधिकाऱ्याचे फोन वाजता कामा नये. तसंच सर्वांनी नियमांचे काटेकोरपणे पालन करावं, अशा सुचनाही त्यांनी दिल्या. मिटींगनंतर ते आपल्या पुढील कामासाठी रवाना झाले. दरम्यान, कर्मचाऱ्यांच्या हजेरीसाठी वापरात येणाऱ्या पंचिंग मशीनमध्ये बिघाड झाल्याने कार्यालयात येणाऱ्या कर्मचाऱ्यांची एकच तारांबळ उडाल्याचं पहायला मिळालं.

तुकाराम मुंढे हे शिस्तप्रिय, कर्तव्यदक्ष अधिकारी म्हणून ओळखले जातात. ते एडस नियंत्रण प्रकल्पाच्या संचालकपदावर होते. तत्कालीन देवेंद्र फडणवीस सरकारने त्यांची एडस नियंत्रण प्रकल्पाच्या संचालकपदावर नियुक्ती केली होती. तुकाराम मुंढे हे नागपूर महानगरपालिकेत येणार हे कळल्यानंतर अनेक कर्मचाऱ्यांनी धसका घेतला होता. तसंच अनेक कर्मचारी वेळेपूर्वी कार्यालयात हजर राहत असल्याचंही समोर आलं होतं.

कशी आहे मुंढेंची कार्यपद्धती ?
आता त्यांची भाजपाची सत्ता असलेल्या नागपूर महापालिकेच्या आयुक्तपदी बदली करण्यात आली आहे. माजी मुख्यमंत्री आणि विरोधी पक्ष नेते देवेंद्र फडणवीस हे नागपूरचेच असून त्यांना अडचणीत आणण्यासाठी उद्धव सरकारने ही खेळी खेळल्याचे बोलले जाते. तुकाराम मुंढे हे नियमांची कठोर अंमलबजावणी करण्यासाठी ओळखले जातात. त्यांनी कधीही नियमबाह्य गोष्टींना थारा दिलेला नाही. त्यामुळेच राजकरण्यांना ते नेहमीच खुपतात.

सर्वपक्षीय राजकारणी तुकाराम मुंढे यांच्याविरोधात एकत्र का येतात?
आतापर्यंत महाराष्ट्राच्या वेगवेगळया भागांमध्ये त्यांची बदली झाली असून, त्यांनी प्रत्येक ठिकाणी आपल्या कामाची छाप उमटवली आहे. नियमबाह्य, अनधिकृत बांधकामांना अभय देण्याच्या मुद्दावरुन त्यांचा नेहमीच राजकारण्यांबरोबर संघर्ष झाला आहे. नाशिक असो किंवा नवी मुंबई महापालिका नेहमीच सर्वपक्षीय राजकारणी त्यांच्याविरोधात एकत्र आल्याचे दिसले आहे.

राजकारण्यांच्या दबावापुढे न झुकता नियमानुसार काम करणे ही तुकाराम मुंढे यांची खासियत आहे. त्यामुळेच राजकारण्यांना जरी ते नकोस वाटत असले तरी, सर्वसामान्यांमध्ये ते लोकप्रिय आहेत. काही ठिकाणी तुकाराम मुंढे यांची बदली रोखण्यासाठी सर्वसामान्य जनतेने रस्त्यावर उतरुन आंदोलन केलं होतं. अशा मुंढे यांनी आज नागपूर मनपाच्या आयुक्तपदाची जबाबदारी स्वीकारली आहे.

First Published on January 28, 2020 10:58 am

Web Title: tukaram mundhe takes charge of nagpur mahanagar palika jud 87
Next Stories
1 पंकजा मुंडेंच्या व्यासपीठावर देवेंद्र फडणवीस यांच्या हातात बूट, फोटो व्हायरल
2 सत्ता होती तेव्हा गोट्या खेळत होता का? इम्तियाज जलील यांचा पंकजा मुंडेंना सवाल
3 “खोलीत दोन हाणा पण बाहेर साहेब म्हणा ही शिवसेनेची जुनी सवय”
Just Now!
X