डहाणू तालुक्यातील समुद्रकिनाऱ्यावर एकाच दिवशी दोन अज्ञात मृतदेह आढळल्याने परिसरात खळबळ माजली आहे. काही दिवसांपूर्वीही या किनाऱ्यावर मृतदेह आढळल्याची घटना घडली होती. चिखले व नरपड समुद्र किनाऱ्यावर हे दोन्ही मृतदेह नागरिकांना आढळून आले. हे मृतदेह कुजलेल्या अवस्थेत असल्याने चेहरा दिसत नसला तरी गळ्यातील दोऱ्यावरून एक व्यक्ती ख्रिश्चन समाजाचा असावा असा प्राथमिक अंदाज वर्तविला जात आहे. चिखले येथे घोलवड पोलीस तर नरपड येथे डहाणू पोलीस पोचले असून, दोन्ही ठिकाणी अकस्मात मृत्यूची नोंद दाखल करण्याची प्रक्रिया सुरू आहे.या घटनांचा पोलीस अधिक तपास करत आहेत. मंगळवारी गोराई येथील समुद्रात लकी स्टार बोट बुडाली होती. बोटीतील दोन मच्छिमार बेपत्ता आहेत, हेच ते दोघे असावे असा अंदाज असल्याचे येथील नागरिक सांगत आहेत.
