कोल्हापूर जिल्ह्यातील करोनाबाधितांच्या संख्येत वाढ होत आहे. इचलकरंजीत आज सकाळी एका ५८ वर्षीय महिलेचा करोनामुळे मृत्यू झाला आहे. तीन दिवसापूर्वी उपचारार्थ 'सीपीआर'मध्ये दाखल केलेल्या या महिलेचा आज पहाटे सहा वाजता मृत्यू झाला. कोल्हापूर जिल्ह्यातील करोनाचा हा १४ वा बळी ठरला आहे. याचबरोबर इचलकरंजीमधील करोनाबाधितांची एकूण संख्या आता ५३ वर पोहचली आहे. करोनाला प्रतिबंध करण्यासाठी शहरासाठी योग्य तो कडक निर्णय घ्यावा, अशी मागणी शहरवासीयांनी केली आहे. दरम्यान, इचलकरंजी शहरातील एका लोकप्रतिनिधीच्या घरातील दोन सदस्यांना देखील करोाची बाधा झाली असल्याची माहिती समोर आली आहे. यामुळे शहरात अधिकच खळबळ उडाली आहे. शहरातील नागरिकांनी घरी राहावे सुरक्षित राहावे, असे प्रशासनाकडून वारंवार आवाहन करण्यात येत आहे.
