परभणीपासून आठ किलोमीटर अंतरावरील मांडाखळी येथे वीज पडून दोन ठार, तर दोन जण गंभीर जखमी झाले. जखमींना परभणीच्या शासकीय रुग्णालयात दाखल करण्यात आले. बुधवारी दुपारी चारच्या सुमारास हा प्रकार घडला. मांडाखळी परिसरात दुपारी चारच्या दरम्यान वादळी वाऱ्यासह पाऊस झाला. पाऊस आल्याने चार युवक विश्वनाथ शिराळे यांच्या शेतातील झाडाखाली थांबले होते. वादळी वारे व पाऊस सुरू असताना विजेचा कडकडाट चालू होता. झाडावर वीज पडल्याने सज्जन बन्सीधर जोत व किरण सुखदेव गायकवाड हे दोघे जागीच मृत्युमुखी पडले, तर ओंकार विश्वनाथ शिराळे व प्रवीण श्रीधर शिराळे हे गंभीर जखमी झाले. गावकऱ्यांनी तातडीने जखमींना परभणीच्या जिल्हा शासकीय रुग्णालयात दाखल केले. जखमींवर उपचार चालू आहेत. दोघांची प्रकृती चांगली असल्याचे गावकऱ्यांकडून सांगण्यात आले.
