भामरागडच्या पोमके ताडगाव हद्दीत मौजा बांदेनगर जंगल परिसरात ताडगाव पोलीस पथक नक्षलविरोधी अभियान राबवत असताना आज दुपारी बांदेनगर जंगलात नक्षलवादी व पोलिसांत झालेल्या चकमकीत जहाल नक्षलवादी व पेरीमिली दलमची उपकमांडर सरिता ठार झाली. बांदेनगर जंगलात दबा धरून बसलेल्या नक्षलवाद्यांनी पोलीस पथकावर अंदाधुंद गोळीबार केला. ताडगाव पोलीस पथकाने चोख प्रत्युत्तर दिल्यामुळे नक्षलवादी जंगलात पळून गेले. दरम्यान, या चकमकीनंतर घटनास्थळी जहाल नक्षलवादी सरिताचा मृतदेह दिसून आला, तसेच घटनास्थळावरून एक एसएलआर, दारूगोळा व इतर नक्षली साहित्य जप्त करण्यात आले. या जंगल परिसरात गडचिरोली पोलीस दलाकडून नक्षलविरोधी अभियान तीव्र करण्यात आले आहे. सरिता ही कुख्यात नक्षलवादी साईनाथ याची पत्नी आहे. तिच्यावर ६ लाखांचे बक्षीस असून १५ ते २० गुन्ह्य़ांत तिचा सहभाग होता.