राज्याचे उपमुख्यमंत्री अजित पवार हे आपल्या बेधडकपणे बोलण्याच्या शैलीसाठी ओळखले जातात. असाच काहीसा प्रकार शनिवारी बारामतीमध्ये पाहायला मिळाला. बारामतीमधल्या नियोजित कार्यक्रमांना अजित पवारांनी हजेरी लावली होती. या कार्यक्रमावेळी त्यांनी खरेदी विक्री संघाच्या पदाधिकाऱ्यांना अधिकारी आणि पदाधिकाऱ्यांना सूचना देताना फटकारले आहे. तुम्ही मला कसलीही कारणं सांगू नका, जरा माझ्या गतीने कामे करा, असं अजित पवार पदाधिकाऱ्यासह अधिकाऱ्यांना म्हणाले. यावेळी पेट्रोल पंपाच्या परवानगीच्या कामात उशीर होत असल्याबद्दल कारण सांगण्यात आलं. यावेळी अजित पवारांनी मला कारणं सांगू नका, जरा माझ्या गतीने कामे करा. दिवाळीपूर्वी कामे पूर्ण करा, लागेल तिथे सहकार्य करु, अशा सूचना अजित पवार यांनी अधिकाऱ्यांसह पदाधिकाऱ्यांना दिल्या आहेत. “सार्वजनिक बांधकाम विभागाचे कार्यकारी अभियंता इथे आहे. तुम्ही ना काही जणं माझ्या गतीनं कामं करा म्हणजे कामं होतील. ही काय पद्धत झाली? अधिकाऱ्यांना भेटा,” असे अजित पवारांनी म्हटले आहे. माझी स्वतःची गाडी पेट्रोल भरायला आली तरी बिल द्यायचं “माझी व्यवस्थापकीय संचालकांना विनंती आहे की, माझी स्वतःची गाडी जरी पेट्रोल डिझेल भरायला आली तरी बिल द्यायचं उधारी घ्यायची नाही. काहीही घ्यायला आलं तरी अजिबात उधारीचा धंदा नकोय आपल्याला,” अशी सूचना अजित पवार यांनी केली आहे. जिल्हा बँक चालवण्याचे अधिकार केंद्र सरकारने जवळपास काढून घेतले यावेळी बोलताना जिल्हा बँक चालवण्याचा अधिकार केंद्र सरकारने जवळपास काढून घेतला असे अजित पवारांनी म्हटले आहे. केंद्र सरकारने जिल्हा सहकारी बँकेवर निर्बंध घातले आहेत. त्याच्या विरोधात राज्य सरकार कोर्टात जाणार असल्याची माहिती अजित पवारांनी दिली. केंद्र सरकारने बरेच नविन बदल केले आहेत. त्याकरता आम्ही कोर्टात जाणार आहोत. बॅंक चालवण्याचा जिल्ह्याचा अधिकार जवळपास काढून घेतला आहे. आम्ही चांगल्या पद्धतीने बँक चालवण्याचा प्रयत्न केला. पहिल्या पाच बँकांमध्ये सातारा आणि पुणे जिल्हा बँक यांचा समावेश होतो. पण तरीदेखील सहकारी बँकामधील अर्थव्यवस्था स्वतःच्या ताब्यात यावी अशा प्रकारचा केंद्राचा प्रयत्न चाललेला आहे. त्याच्या विरोधात आम्ही चांगल्या वकिलाचा सल्ला घेऊन सहकार विभागाच्या वतीने पुढं कसं जायच याचा विचार करीत आहोत, असे अजित पवार यांनी म्हटले आहे.
