राष्ट्रवादी काँग्रेसला रामराम करुन भाजपात आलेल्या गणेश नाईक यांच्यामुळे विद्यमान आमदार मंदा म्हात्रे यांचा पत्ता कट होण्याची शक्यता आहे. नवी मुंबईत भाजपाकडून गणेश नाईक यांना तिकिट मिळण्याबाबत हिरवा कंदिल मिळाल्याची चर्चा आहे. त्यामुळे असे झाल्यास विद्यमान आमदार मंदा म्हात्रे नाराज होणार हे निश्चित मानलं जातं आहे. बेलापूर मतदारसंघात गणेश नाईक यांनी कार्यकर्त्यांसोबत विभागवार बैठकांना सुरुवातही केली आहे. काही दिवसांपूर्वीच गणेश नाईक राष्ट्रवादी सोडून भाजपात आले. मात्र त्यांच्या येण्याचा फटका विद्यमान आमदार मंदा म्हात्रे यांना बसल्याची चर्चा नवी मुंबईच्या राजकीय वर्तुळात रंगली आहे. काहीही झालं तरीही बेलापूरची आमदार मीच असेन असं मंदा म्हात्रे यांनी गणेश नाईक यांच्या भाजपा प्रवेशाच्या आधी आणि त्यांच्या भाजपा प्रवेशाच्या वेळीही सांगितलं होतं. गणेश नाईक यांना भाजपात घेण्यासाठी मंदा म्हात्रे यांनी विरोधही दर्शवला होता. मात्र भाजपाने त्यांची समजूत घातली. गणेश नाईक यांच्या भाजपा प्रवेशाच्या कार्यक्रमातही मंदा म्हात्रे उपस्थित होत्या. मात्र त्यांना भीती होती ती आपलं तिकिट कापलं जाण्याची आणि जी चर्चा सुरु आहे त्यावरुन अशीच शक्यता आहे की मंदा म्हात्रे यांचं तिकिट कापलं जाणार. समजा मंदा म्हात्रे यांचं तिकिट कापलं गेलं तर त्या नाराजीचा सूर आळवतील यामुळे काय होईल ते येत्या काळात स्पष्ट होईल, तूर्तास तरी गणेश नाईक यांच्या भाजपा प्रवेशामुळे मंदा म्हात्रे यांची धाकधूक वाढली आहे असंच चित्र आहे. महाराष्ट्र विधानसभेचे उमेदवार ठरवण्यासाठी भाजपाचे राष्ट्रीय अध्यक्ष आणि केंद्रीय गृहमंत्री अमित शाह, भाजपाचे कार्यकारी अध्यक्ष जे. पी. नड्डा यांच्या अध्यक्षतेखाली बैठक सुरु आहे. या बैठकीत केंद्रीय मंत्री नितीन गडकरी, मुख्यमंत्री देवेंद्र फडणवीस, प्रदेशाध्यक्ष चंद्रकांत पाटील, ग्रामविकास मंत्री पंकजा मुंडेही हजर आहेत. या बैठकीत २८८ जागांचा आढावा घेतला जातो आहे. युती झाली नाही तर स्वबळाचीही चाचपणी सुरु आहे असेही समजते आहे. एका मराठी वृत्तवाहिनीने यासंदर्भातले वृत्त दिले आहे. दरम्यान विधानसभा निवडणुकीसाठी शिवसेनेनेही बेलापूर मतदारसंघावर दावा सांगितला आहे. त्यामुळे बेलापूरची जागा शिवसेनेला हवी आहे का? असंही चित्र निर्माण झालं आहे. त्यामुळे आता नेमकं काय होणार हे काही दिवसात स्पष्ट होईल.