महाराष्ट्रात सत्ता स्थापनेवरुन शिवसेना-भाजपामध्ये कुरघोडीचे राजकारण रंगलेले असताना दोन्ही पक्षाचे नेते व्यंगचित्राच्या माध्यमातून परस्परांना टोमणे मारत आहेत. शिवसेनेने आज मुख्यमंत्रिपदाच्या मागणीचा पुनरुच्चार केल्यानंतर दिल्ली भाजपाचे प्रवक्ते तेजिंदर पाल सिंह बग्गा यांनी एक व्यंगचित्र टि्वट करुन शिवसेनेला टोमणा मारला आहे. शिवसेना नेते संजय राऊत यांनी महाराष्ट्रात आम्ही सरकार स्थापन करु असे विधान केल्यानंतर तेजिंदर बग्गा यांनी राजकीय व्यंगचित्र टि्वट केले आहे. महाराष्ट्राच्या राजकारणात वाघ ही शिवसेनेची ओळख आहे. बग्गा यांनी टि्वट केलेल्या व्यंगचित्रात एक वाघ असून मुख्यमंत्री देवेंद्र फडणवीस रिंगमास्टरच्या भूमिकेत दिसत आहेत. pic.twitter.com/YM7R64SLyp — Tajinder Pal Singh Bagga (@TajinderBagga) November 1, 2019 या फोटोमध्ये देवेंद्र फडणवीस यांच्या हातामध्ये एक रिंग असून ते आनंदी मूडमध्ये दिसत आहेत. "शेवटी तुला यायचेच आहे, फक्त थोडा वेळ लागेल" असा संदेशही या व्यंगचित्रावर आहे. यापूर्वी सुद्धा राष्ट्रवादी, शिवसेना आणि भाजपाने अशा चित्रांच्या माध्यमातून परस्परांना टोले लगावले आहेत. मागच्या आठवडयात निवडणुकीचे निकाल जाहीर झाल्यानंतर संजय राऊत यांनी एक व्यंगचित्र पोस्ट केले होते. त्यामध्ये वाघाने एका हातामध्ये कमळ पकडले होते तर घडयाळ गळयामध्ये होते. कमळ भाजपाचे तर घडयाळ राष्ट्रवादी काँग्रेसचे निवडणूक चिन्ह आहे. महाराष्ट्रातल्या जनतेने जो कौल दिलाय त्यामुळे सत्ता स्थापनेच्या चाव्या शिवसेनेच्या हातात असल्याचा संदेश राऊत यांनी या व्यंगचित्राच्या माध्यमातून दिला होता.
