अकोले: तालुल्यातील १७० जणांनी एकल महिलांच्या मुलांचे पालकत्व स्वीकारत सामाजिक क्षेत्रात बदलाचे नवीन पाऊल टाकले. साऊ एकल महिला समितीने सुरू केलेल्या या शैक्षणिक पालकत्व योजनेचा आरंभ नुकताच करण्यात आला.
एकल महिलांच्या मुलांना केवळ शैक्षणिक मदत न देता, त्यांचे शैक्षणिक पालकत्व समाजातील विविध व्यक्तींना देण्याची अभिनव कल्पना साऊ एकल महिला समितीने अकोल्यात राबवली. १ हजार १०० रुपये देणारे समाजातील कुटुंब निवडून त्यांना एकल महिलांचे पाल्य दत्तक देण्यात आले. वर्षभर निवडलेले हे शैक्षणिक पालक या एकल महिलांच्या मुलांच्या शिक्षणाची काळजी घेतील. चौकशी करतील. सणाच्या निमित्ताने कुटुंबाला भेट देतील.
यातून समाजाला एकल महिलांशी जोडण्याचा प्रयत्न करण्यात येत आहे. या अनाथ विद्यार्थ्यांना कुटुंबस्नेह देण्याचीही यामागे भावना असल्याचे या संघटनेच्या प्रमुख प्रतिमा कुलकर्णी यांनी सांगितले. या संकल्पनेला अकोल्यातील नागरिकांनी चांगला प्रतिसाद दिला असून २५० विद्यार्थ्यांचे शैक्षणिक पालकत्व यात स्वीकारण्यात आले. या विद्यार्थ्यांना एक गणवेश, स्कूल बॅग, कंपास, वह्या, जेवणाचा डबा, पाणी बाटली देण्यात आली.
या पालकत्व प्रकल्पाला ‘संवेदना’ नाव देण्यात आले व यातून समाज या प्रश्नाशी जोडण्याचा हा प्रयत्न असल्याचे प्रतिमा कुलकर्णी यांनी सांगितले. शैक्षणिक साहित्य वितरण कार्यक्रम व शैक्षणिक पालकत्व संवेदना कार्यक्रमाला शांताराम गजे, पुष्पाताई लहामटे, नीता आवारी, कुंदन कोरडे, वकील वसंत मनकर, नगरसेवक प्रतिभा मनकर, सुगावच्या सरपंच अनुप्रिता शिंदे, ललित छल्लारे, सुनील शेळके, रेखा धर्माधिकारी, मनोज गायकवाड, हेरंब कुलकर्णी, प्रकाश टाकळकर, रोटरी क्लबचे अध्यक्ष विद्याचंद्र सातपुते, हरिभाऊ फापाळे, अक्षय आभाळे, सुभानभाई शेख आदी उपस्थित होते.
