टेंभुर्णी-पंढरपूर रस्त्यावर परिते एसटी बसस्थानकावर थांबलेल्या सहाआसनी रिक्षा व दुचाकी वाहनाला भरधाव वेगातील मालमोटारीने ठोकरल्याने घडलेल्या अपघातात तिघा जणांचा बळी गेला. धनंजय तुकाराम लामकाने (४०, रा. परिते, ता. माढा), त्याचा मुलगा समर्थ (५) व संतोष दत्तात्रेय बारसकर (३०, रा. आहेरगाव, ता. माढा) अशी तिघा मृतांची नावे आहेत. मृत संतोष बारसकर हा सहाआसनी रिक्षा घेऊन परिते एसटी थांब्यावर थांबला होता. त्याच वेळी शेजारी मोटारसायकलवर धनंजय लामकाने हे आपल्या मुलासह थांबले होते. परंतु पंढरपूरहून टेंभुर्णीकडे वळण घेत जाणारी मालमोटार अचानकपणे बसस्थानकात घुसली. यात सहाआसनी रिक्षा व मोटारसायकलला जोराची धडक बसल्याने त्यात तिघांचा बळी गेला. एसटी थांबा उडवल्यानंतर मालमोटारही पालथी झाली. मालमोटारचालकाविरुद्ध टेंभुर्णी पोलीस ठाण्यात गुन्हा दाखल झाला आहे.
