दिल्लीतील आंदोलनानंतर आता कॉक्रोच जनता पार्टीचे संस्थापक अभिजीत दिपके यांनी राज्यातील आणि देशातील सरकारी शाळांकडे आपला मोर्चा वळवला आहे. ग्रामीण भागात असलेल्या सरकारी शाळांमधील दुरवस्था दाखवण्यासाठी दिपके यांनी मोहीम हाती घेतलेली आहे. स्वतः अभिजीत दिपके हे विविध गावांमध्ये फिरून शाळांची पाहणी करत आहेत. शाळांमधील विद्यार्थ्यांच्या अडचणी समजून घेऊन त्या सोडवण्यासाठी दिपके हे काम करत आहेत.

या दरम्यान शाळांमधील समस्या आणि विविध मुद्यांवरून अनेकदा अभिजीत दिपके हे केंद्र आणि राज्य सरकारवर जोरदार टीकाही करत आहेत. आता अभिजीत दिपके यांनी भारतीय जनता पक्षावर आणि पंतप्रधान मोदींवर पुन्हा एकदा जोरदार टीका केली आहे. ‘भाजपाला आपण आरएसएसपेक्षा मोठे आहोत असं वाटतंय, पण त्यांनी मोहन भागवत यांचं तरी ऐकलं पाहिजे’, असं वक्तव्य अभिजीत दिपके यांनी आज (३० ऑगस्ट) केलं आहे. या संदर्भातील वृत्त पीटीआयने एक्सवर (ट्विटर) दिलं आहे.

अभिजीत दिपके काय म्हणाले?

भाजपाने राष्ट्रीय स्वयंसेवक संघाचं ऐकणं किंवा त्यांचा सल्ला घेणं सोडून दिलं आहे का? असा सवाल अभिजीत दिपके यांनी काही दिवसांपूर्वी केला होता. त्यानंतर आता दिपके यांनी भाजपाला आरएसएस प्रमुख मोहन भागवत यांचं ऐकण्याचं आवाहन केलं आहे. दिपके यांनी म्हटलं की, “मी हे आधीपासून सांगत आहे की भाजपाच्या लोकांनी थोडं तरी मोहन भागवत यांचं ऐकलं पाहिजे. मला वाटतं की १२ वर्ष सत्ता हातात असताना आणि एवढ्या सर्व यंत्रणा हातात असल्यामुळे भाजपाला असं वाटतंय की ते आरएसएस पेक्षा मोठे झाले. पण भाजपाने थोडं तरी मोहन भागवत यांचं ऐकलं पाहिजे.”

हेही वाचा

“मोहन भागवत यांनी ‘जेन झी’च्या आंदोलनाला अँटी नॅशनल न बोलण्याचं आवाहन केलं होतं. मात्र, त्यानंतरही पंतप्रधान मोदी यांनी आणखी एक ‘दिमागी नक्षल’ हा शब्द आणला. त्यामुळे यावरून असं स्पष्ट दिसून येत आहे की भाजपा किंवा पंतप्रधान मोदी हे मोहन भागवत यांचं ऐकत नाहीत. आमचं नाही पण किमान मोहन भागवत यांचं तरी भाजपाने ऐकावं”, असं म्हणत अभिजीत दिपके यांनी भाजपावर टीका केली.

‘मनोज जरांगेंच्या आंदोलनाला भेट देणार’ : दिपके

“मी सध्या हे पाहत आहे की आंदोलन करण्याची गरज का पडतेय? कारण लोकांच्या मनात अशी भावना निर्माण झाली आहे की सरकार आपल्या मुलांना दर्जेदार शिक्षण आणि रोजगाराच्या संधी उपलब्ध करून देण्यात पूर्णपणे अपयशी ठरलेलं आहे. त्यामुळे आता लोकांचा सरकारवरील विश्वास हळूहळू कमी होत चालला आहे. त्यामुळे आता मनोज जरांगे पाटील यांना देखील आंदोलन करावं लागत आहे. खरं तर आंदोलन करायला कोणालाच आवडत नाही. आंदोलन हा नेहमीच शेवटचा पर्याय असतो. जेव्हा तुम्ही चर्चा करता, विनंत्या करता पण तरीही जर सरकार ऐकत नसेल तर मग शेवटी आंदोलनाचा पर्याय असतो. मनोज जरांगे पाटील हे मराठा समाजातील मुलांच्या दर्जेदार शिक्षणाची मागणी आहेत. आजच्या घडीला हाच सर्वात मोठा आणि अत्यंत महत्त्वाचा मुद्दा आहे. मनोज जरांगे पाटील यांची मी तेथे जाऊन भेट घेणार आहे. कारण ते आम्हाला पाठिंबा देण्यासाठी दिल्लीला आले होते, आता त्यांच्या पाठीशी उभं राहणं हे आमचंही कर्तव्य आहे”, असं दिपके यांनी म्हटलं आहे.