अहिल्यानगर जिल्ह्यातील ७७१ ग्रामपंचायतींची प्रारूप प्रभाग रचना जाहीर; निवडणुकांचा बिगुल वाजणार!

अहिल्यानगर ५९, अकोले ५२, संगमनेर ९४, कोपरगाव २९, राहता २५, श्रीरामपूर २७, राहुरी ४४, नेवासे ५९, पाथर्डी ७९, शेवगाव ४८, कर्जत ५५, जामखेड ४९, पारनेर ८८ व श्रीगोंदे ७२ अशा एकूण ७७१ ग्रामपंचायती आहेत.

Ahilyanagar Gram Panchayat Election 2026 | Maharashtra Local Body Polls Draft Ward Structure | Ahilyanagar Collector Office Election Updates | Marathi News Gram Panchayat Prabhag Rachna

अहिल्यानगर जिल्ह्यातील ७७१ ग्रामपंचायतींची प्रारूप प्रभाग रचना जाहीर; निवडणुकांचा बिगुल वाजणार! ( AI Generated Image )

अहिल्यानगर: जिल्ह्यातील ८६६ ग्रामपंचायतींच्या निवडणुका प्रस्तावित आहेत. तेथे सध्या प्रशासकीय राजवट आहे. त्यापैकी ७७१ ग्रामपंचायतींची प्रारूप प्रभाग रचना महसूल विभागाकडून जाहीर करण्यात आली आहे. या प्रारूप प्रभाग रचनेवर १३ एप्रिलपर्यंत हरकती, सूचना व आक्षेप दाखल करण्यास मुदत देण्यात आली आहे.

प्रारूप प्रभाग रचना जाहीर झालेल्या ग्रामपंचायतींची तालुकानिहाय संख्या पुढीलप्रमाणे आहे. अहिल्यानगर ५९, अकोले ५२, संगमनेर ९४, कोपरगाव २९, राहता २५, श्रीरामपूर २७, राहुरी ४४, नेवासे ५९, पाथर्डी ७९, शेवगाव ४८, कर्जत ५५, जामखेड ४९, पारनेर ८८ व श्रीगोंदे ७२ अशा एकूण ७७१ ग्रामपंचायती आहेत.

जिल्ह्यात गेल्यावर्षी मुदत संपलेल्या ९९ ग्रामपंचायतीच्या निवडणुका लोकसभा, विधानसभा निवडणुकींमुळे लांबणीवर पडल्या. तेथे सध्या प्रशासकामार्फत कारभार सुरू आहे. सन २०२६ मध्ये ७६७ ग्रामपंचायतीची मुदत संपत आहे. तेथे निर्धारित वेळेत निवडणुका घेण्यासाठी डिसेंबर २०२५ मध्येच निवडणूक कार्यक्रम जाहीर होणे अपेक्षित होते. परंतु नगरपालिका, महानगरपालिका निवडणूक प्रक्रिया सुरू झाल्याने जिल्ह्यातील एकूण ८६६ ग्रामपंचायतींच्या निवडणुका पुढे ढकलल्या गेल्या.

हेही वाचा

एसटीकडून सेवानिवृत्त कर्मचाऱ्यांना दिलासा… मोफत प्रवासासोबत डिजिटल एनसीएमसी कार्डची सुविधा

मुदत संपणाऱ्या ग्रामपंचायतींच्या निवडणूक प्रक्रियेपूर्वी संबंधित ग्रामपंचायतींची प्रभाग रचना कार्यक्रम तयार करून त्यावर हरकती, सुनावणी घेण्याचा कार्यक्रम प्रसिद्ध करणे आवश्यक आहे.

त्यानुसार जिल्ह्यातील ७७१ ग्रामपंचायतींच्या प्रारूप प्रभाग रचनेचा कार्यक्रम संबंधित ग्रामपंचायत कार्यालय, पंचायत समिती व तहसील कार्यालयात प्रसिद्ध करण्यात आला आहे. त्यावर नागरिकांनी येत्या १३ एप्रिलपर्यंत हरकती, आक्षेप व सूचना तहसीलदारांकडे दाखल करता येणार आहेत. दाखल झालेल्या हरकतींवर प्रांताधिकार्‍यांसमोर सुनावणी घेतली जाणार आहे.

यापूर्वी जानेवारी ते डिसेंबर २०२४ मध्ये मुदत संपलेल्या ८४ ग्रामपंचायतीची प्रभाग रचना व मतदार याद्यांचा कार्यक्रम पूर्ण झाला होता तसेच जानेवारी ते डिसेंबर २०२५ मध्ये मुदत संपलेल्या १५ ग्रामपंचायतींचा देखील प्रभाग रचनेचा कार्यक्रम झाला होता. त्यामुळे ९९ ग्रामपंचायतींच्या निवडणुका अगोदरच्या टप्प्यात होतील.

हेही वाचा

संजय जाधव यांच्याबरोबर ओमराजे निंबाळकरही शिवसेनेच्या वाटेवर ? मंत्री आबिटकर यांचे सूचक विधान

जिल्ह्यात नगरपालिका महापालिका यांच्या निवडणुका लांबलेल्या होत्या. त्या आता पार पडल्या, मात्र जिल्हा परिषद पंचायत समितीच्या निवडणुका अद्याप प्रतीक्षेत आहेत. तेथेही प्रशासक राज आहे. ग्रामपंचायतींची प्रभाग रचना झाली तरी या निवडणुका जिल्हा परिषदेच्या निवडणुकांपूर्वी होतील की नंतर याबद्दल संदिग्धता आहे. ग्रामपंचायतींवर प्रशासक समिती म्हणून पूर्वीचेच सरपंच व सदस्य नियुक्त करण्यात आले असले तरी त्यांना धोरणात्मक निर्णय घेण्यास न्यायालयाने मनाई केलेली आहे. त्यांच्या आर्थिक अधिकारावरही मर्यादा आणल्या आहेत.