थकीत ‘एफआरपी’प्रकरणी अहिल्यानगरमधील ९ साखर कारखान्यांना नोटीस

यातील चार साखर कारखान्यांच्या थकीत एफआरपीप्रकरणी उद्या मंगळवार आणि उर्वरित साखर कारखान्यांची परवा बुधवार सुनावणी होणार असल्याची माहिती प्रादेशिक साखर संचालनालयाकडून उपलब्ध झाली.

राज्यातील साखर कारखान्यांचा गाळप हंगाम आता सांगते कडे जाऊ लागलेला आहे. यंदाच्या, सन २०२५-२६ च्या गाळप हंगामातील दि. ३१ जानेवारीअखेरच्या पंधरवडा अहवालानुसार, शेतकर्‍यांच्या ‘एफआरपी’ची ऊसाच्या तोडणी वाहतूक खर्चासह ४ हजार २५२ कोटींची रक्कम अद्यापि राज्यातील साखर कारखान्यांकडे थकीत आहे. ऊस गाळप हंगाम आता अखेरच्या टप्प्याकडे झुकला आहे, असे असूनही नोटिसा काढण्यात आलेल्या कारखान्यांमध्ये काही कारखान्यांनी ‘एफआरपी’ची फारच कमी रक्कम शेतकर्‍यांच्या बँक खात्यावर जमा केली आहे.

साखर आयुक्तालयाच्या ताज्या अहवालावरून २ सहकारी आणि २ खासगी साखर कारखान्यांनी शेतकर्‍यांना अद्यापि एफआरपीचा एकही रुपया दिलेल नाही. म्हणजे १०० टक्के रक्कम थकीत ठेवली आहे. हे कारखाने एफआरपीची रक्कम कधी देणार? असा प्रश्‍न यानिमित्ताने उपस्थित होत आहे.

दरम्यान अहिल्यानगर जिल्ह्यातील केदारेश्‍वर, सोपनराव ढसाळ, स्वामी समर्थ, अगस्ती आणि क्रांती शुगर या ५ साखर कारखान्यांची उद्या साखर आयुक्त डॉ. संजय कोलते यांच्यासमोर सुनावणी होणार आहे. तर परवा गणेश, जय श्रीराम, वृध्देश्‍वर आणि अशोक या चार साखर कारखान्यांची सुनावणी होणार आहे. यासह अहिल्यानगर विभागात समाविष्ट परंतु नाशिक जिल्ह्यात असणार्‍या नाशिक ससाका, एसजे. शुगर्स या साखर कारखान्यांची देखील दोन दिवसात सुनावणी होणार आहे.

या सुनावणी दरम्यान एफआरपी थकीत असणार्‍या साखर कारखाना व्यवस्थापन यांच्याकडून कोणता बचाव करण्यात येणार व साखर आयुक्त त्यावर काय निर्णय देणार, याकडे जिल्ह्यातील शेतकऱ्यांचे लक्ष राहील. गाळप हंगाम सुरू होण्यापूर्वी जिल्हाधिकाऱ्यांनी शेतकरी संघटना व साखर कारखान्यांच्या अधिकाऱ्यांची एकत्रित बैठक घेतली. त्यावेळी दोन कारखान्यांनी दोन वर्षांपासून पैसे थकवल्याची तक्रार करण्यात आली होती. त्यावरील निर्णय अद्याप प्रलंबित आहे.