सोलापूर : विना वाहन क्रमांक वाहनातून प्रवास केल्याबद्दल ‘एमआयएम’चे सर्वोच्च नेते खासदार असदोद्दीन ओवैसी यांना दंड आकारणी करणाऱ्या पोलीस अधिकाऱ्यास पोलीस आयुक्त हरीश बैजल यांनी पाच हजार रुपयांचे बक्षीस जाहीर केले आहे. खासदार ओवैसी हे काल सोलापुरात पक्षाच्या मेळाव्यासाठी आले होते. या मेळाव्यासाठी जात असताना त्यांच्या मोटारीला वाहन क्रमांक असलेली पाटीच नसल्याचे सहायक पोलीस निरीक्षक रमेश चिंताकिंदी यांना आढळले. या वरून त्यांनी ओवैसी यांचे वाहन अडवले आणि दंड भरण्यास सांगितले. ओवैसी यांनी देखील हा दंड लगेच भरला तसेच वाहनात ठेवलेली वाहन क्रमांकाची पाटी बसवण्यास सांगितले. दरम्यान कुठलेही दडपण न बाळगता ही कारवाई केल्याबद्दल पोलीस आयुक्त हरीश बैजल यांनी संबंधित अधिकारी चिंताकिंदी यांचे अभिनंदन केले. तसेच त्यांना पाच हजार रुपयांचे बक्षीस जाहीर केले.
