रत्नागिरी: रत्नागिरीच्या क्रीडा क्षेत्रात एका चिमुकल्याने आपल्या असामान्य कामगिरीने नवा इतिहास घडवला आहे. आयरिश चक्रवर्ती या चिमुकल्या जलतरणपटूने पाठीवर तरंगत १०० मीटरचे अंतर यशस्वीरीत्या पूर्ण केले. या कामगिरीची विविध विक्रम नोंदणी संस्थांनी दखल घेतली असून, अवघ्या बालवयात जलतरणातील या पराक्रमामुळे रत्नागिरीच्या शिरपेचात मानाचा तुरा रोवला गेला आहे.

रत्नागिरीच्या शासकीय जलतरण तलावात आयरिशने हा विक्रम साकारला. २५ बाय २१ मीटरच्या तलावात सलग चार फेऱ्या पूर्ण करत त्याने १०० मीटरचे अंतर १६ मिनिटे ४५ सेकंदांत पार केले. इतक्या कमी वयात पाण्यावर स्वतःला संतुलित ठेवत निर्धारित अंतर पूर्ण करण्याची त्याची क्षमता उपस्थितांसाठी आश्चर्याचा विषय ठरली. आयरिशच्या या कामगिरीने जलतरण क्षेत्राचे लक्ष वेधून घेतले आहे.

तीन विक्रम नोंदणी संस्थांकडून दखल

आयरिशच्या या कामगिरीची ‘इंडिया बुक ऑफ रेकॉर्ड्स’, ‘आशिया बुक ऑफ रेकॉर्ड्स’ आणि ‘इंटरनॅशनल बुक ऑफ रेकॉर्ड्स’मध्ये नोंद झाल्याचे सांगण्यात आले आहे. तसेच ‘गिनिज बुक ऑफ वर्ल्ड रेकॉर्ड्स’ आणि ‘लंडन बुक ऑफ वर्ल्ड रेकॉर्ड्स’ यांच्याकडूनही मान्यतेची प्रक्रिया सुरू असल्याची माहिती देण्यात आली आहे. या नोंदींच्या आधारे आयरिशच्या कामगिरीला व्यापक स्तरावर ओळख मिळण्याची अपेक्षा व्यक्त केली जात आहे.

दुबईहून रत्नागिरीपर्यंतचा प्रवास

आयरिशचे पालक दुबईहून भारतात परतल्यानंतर त्याच्या जलतरण सरावासाठी त्यांनी पुण्यात प्रयत्न केले. मात्र, त्याचे अत्यंत कमी वय लक्षात घेता तेथे सरावाच्या दृष्टीने अडचणी निर्माण झाल्या. अशा परिस्थितीत त्यांनी रत्नागिरीतील ‘महेश मिलके स्विमिंग ग्रुप’च्या अनुभवावर आणि मार्गदर्शनावर विश्वास ठेवला. त्यानंतर आयरिशच्या जलतरण प्रशिक्षणासाठी त्यांनी रत्नागिरी गाठली.

या ग्रुपमध्ये दाखल झाल्यानंतर अवघ्या पाच महिन्यांत आयरिशने ही उल्लेखनीय कामगिरी केली. मुख्य प्रशिक्षक महेश मिलके, गौरी मिलके, करण मिलके आणि तनया मिलके यांनी त्याच्या सरावासाठी विशेष परिश्रम घेतले. वयाला अनुरूप प्रशिक्षण, योग्य तंत्र आणि सातत्यपूर्ण सरावाच्या माध्यमातून आयरिशला घडविण्यात या प्रशिक्षकांची महत्त्वपूर्ण भूमिका राहिली.

प्रशिक्षकांच्या मेहनतीला यशाची पावती

जलतरणासारख्या क्रीडा प्रकारात लहान वयापासून पाण्याशी परिचय, शरीराचा समतोल आणि योग्य प्रशिक्षण यांना विशेष महत्त्व असते. आयरिशच्या या कामगिरीमागे त्याच्या पालकांचा विश्वास, प्रशिक्षकांचे मार्गदर्शन आणि सरावातील सातत्य या बाबी महत्त्वाच्या ठरल्या आहेत.

अवघ्या १७ महिन्यांच्या आयरिशने मिळवलेले हे यश केवळ त्याच्या कुटुंबापुरते मर्यादित नसून, रत्नागिरीच्या क्रीडा क्षेत्रासाठीही अभिमानाची बाब ठरले आहे. या कामगिरीमुळे महेश मिलके स्विमिंग ग्रुपच्या प्रशिक्षणकार्याचीही चर्चा होत आहे. आयरिश चक्रवर्ती आणि त्याला घडविणाऱ्या मिलके कुटुंबावर अभिनंदनाचा वर्षाव होत असून, त्याच्या पुढील वाटचालीकडे क्रीडाप्रेमींचे लक्ष लागले आहे.