Ajit Pawar Died in Plane Crash : “अजितदादांचा अपघात झाला त्या विमानाचे वैमानिक सुमित कपूर असणार नव्हते, पण..” मित्रांनी काय सांगितलं?

कॅप्टन सुमित कपूर यांच्या मित्रांनी काय माहिती दिली?

कॅप्टन सुमित कपूर यांच्या मित्रांनी सांगितल्यानुसार अजित पवारांना घेऊन जे विमान बारामतीला जाणार होतं त्या विमानाचं उड्डाण करण्याची जबाबदारी कंपनीने दुसऱ्या एका वैमानिकावर सोपवली होती. सुमित कपूर हे ते विमान चालवणार नव्हते. मात्र अजित पवारांना बारामतीला घेऊन जाण्याची जबाबदारी ज्या वैमानिकावर होती तो वेळेवर पोहचू शकला नाही. वाहतूक कोंडीत तो अडकला त्यामुळे सुमित कपूर यांना तुम्ही अजित पवारांना घेऊन बारामतीला जा हे सांगण्यात आलं आणि अशा रितीने सुमित कपूर हे त्या विमानाचे वैमानिक म्हणून आले अशी माहिती सुमित कपूर यांच्या मित्रांनी दिली आहे. एनडीटीव्हीने हे वृत्त दिलं आहे.

सुमित कपूर यांना अचानकच जबाबदारी देण्यात आली

सुमित कपूर यांना अजित पवारांना बारामतीला विमानाने घेऊन जा असा आदेश कंपनीने दिला. ज्यानंतर सुमित कपूर यांनी विमान घेऊन उड्डाण केलं. पण पुढे जी दुर्घटना घडली त्या अपघातात अजित पवारांसह, सुमित कपूर आणि इतर सगळ्यांचाच मृत्यू झाला असं सुमित कपूर यांच्या मित्राने सांगितलं. सुमित कपूर यांचा स्वभाव मनमिळाऊ होता आणि ते कुटुंब वत्सल होते. काही दिवसांपूर्वीच ते हाँगकाँगहून परतले होते. सुमित कपूर यांच्याकडे १६ हजार ५०० तासांहून अधिक काळ विमान उड्डाणाचा अनुभव होता. तसंच आत्तापर्यंत सुमित कपूर यांनी अनेक हाय प्रोफाइल व्यक्तींचं फ्लाईट ऑपरेट केलं होतं. सुमित कपूर यांचे मित्र सचिन तनेजा यांनी सांगितलं की विमानाचं चालवणं हे सुमित कपूर यांच्यासाठी पॅशन होतं. आम्हाला अजूनही विश्वास बसत नाही की सुमित आपल्यात नाहीत. त्यांच्या हातात असलेलं जे कडं होतं त्यावरुन त्यांच्या मृतदेहाची ओळख पटली अशी माहिती जीएस. ग्रोव्हर या त्यांच्या मित्राने दिली.