Amit Thackeray on Social Issue : माहीम विधानसभा मतदारसंघातून पराभूत झालेले अमित ठाकरे आता पुन्हा कामाला लागले आहे. विधानसभेत जाण्याची संधी जनतेने दिली नसली तरीही ते पुन्हा जनकार्यात उतरले आहेत. आज त्यांनी सायन कोळीवाडा येथील मुलीवर अत्याचार आणि ड्रग्सविक्री संदर्भात थेट इशारा दिला आहे. हे शब्द नाहीत तर इशारा आहे, असं म्हणत त्यांनी आज समाज माध्यमावर पोस्ट केली.
“सायन कोळीवाड्यातील पंजाब कॉलनीत काल रात्री घडलेल्या एका भयंकर घटनेनं संपूर्ण मुंबई हादरली आहे. तीन वर्षांच्या चिमुकलीवर ड्रग्सच्या नशेत असलेल्या नराधम अनिल गुप्ताने अमानुष अत्याचार केला”, असं म्हणत अमित ठाकरेंनी महत्त्वाचा मुद्दा उपस्थित केला. ते पुढे म्हणाले, “आज ती चिमुकली सायन रुग्णालयात जीवनमरणाच्या झुंजीत आहे. हा केवळ एका चिमुकलीवर नाही, तर आपल्या समाजाच्या संवेदनांवर झालेला आघात आहे. मुंबईसह इतर शहरांमध्ये दिवसेंदिवस ड्रग्सचं प्रमाण वाढतं आहे, अनेक घरं उद्ध्वस्त होत आहेत.”
हेही वाचा >> Gopichand Padalkar : “शरद पवार नावाचा अध्याय महाराष्ट्राच्या राजकारणातून संपला”; भाजपाच्या नेत्याचं खळबळजनक विधान!
ड्रग्स भारतात पोहोचतं कसं? याचे सुत्रधार कोण?
“महिलांच्या आणि मुलींच्या सुरक्षिततेचा प्रश्न गंभीर झाला आहे. दादर, सायनसारख्या भागातही ड्रग्सच्या विळख्यात गर्दुल्यांची संख्या वाढली असून महिलांनी याबाबत माझ्याकडे अनेकदा तक्रारी केल्या आहेत. कालच भारतीय नौसेनेकडून अंदमान समुद्रात ५ टन ड्रग्स वाहून नेणाऱ्या मच्छीमार बोटीवर कार्यवाही करण्यात आली. एवढ्या मोठ्या प्रमाणात ड्रग्स भारतात येतं कुठून? ते पोहोचतं कुठे? आणि याचे सूत्रधार कोण? या प्रश्नांची उत्तरं मिळवणं आणि ड्रग्सचं नेटवर्क मोडून काढणं आता आवश्यक झालं आहे”, असं अमित ठाकरे म्हणाले.
“मनसेनं सुरुवातीपासूनच अशा नराधमांवर कठोर कारवाईसाठी भूमिका घेतली आहे. माझ्या वचननाम्यात मी ड्रग्स विक्री, सेवन करणाऱ्यांवर कठोर उपाययोजना करण्याचं वचन दिलं होतं आणि आज त्या दिशेनं पाऊल टाकत आहे. सायनमधील या नराधमाला अटक झाली असली, तरी फक्त अटक पुरेशी नाही. काही महिन्यांपूर्वी सायन रुग्णालयात महिला डॉक्टरवर मद्यधुंद पेशंटने अतिप्रसंग केल्याची घटना समोर आली होती. या सगळ्याचा तपास जलदगतीने आणि प्रभावी पद्धतीने पूर्ण झालाच पाहिजे”, अशी मागणी राज ठाकरेंनी केली आहे.
'हे' फक्त शब्द नाहीत, तर इशारा आहे!
— Amit Thackeray (@amitrthackeray) November 26, 2024
सायन कोळीवाड्यातील पंजाब कॉलनीत काल रात्री घडलेल्या एका भयंकर घटनेनं संपूर्ण मुंबई हादरली आहे. तीन वर्षांच्या चिमुकलीवर ड्रग्सच्या नशेत असलेल्या नराधम अनिल गुप्ताने अमानुष अत्याचार केला. pic.twitter.com/ERKKeOPETB
“आरोपीला न्यायालयीन प्रक्रियेतून कडक शिक्षा झालीच पाहिजे. जर या प्रकरणात ठोस कारवाई झाली नाही, तर महाराष्ट्र नवनिर्माण सेना अशा नराधमांना त्यांची जागा दाखवल्याशिवाय शांत बसणार नाही! हे फक्त शब्द नाहीत, तर इशारा आहे. मुलींच्या सुरक्षिततेसाठी, ड्रग्समुक्त महाराष्ट्रासाठी मनसेचा संकल्प अटळ आहे. आता वेळ आली आहे की आपण सगळ्यांनी एकत्र उभं राहून या नराधमांना आणि त्यांच्या समर्थकांना जशास तसं उत्तर देण्याची!”, असा थेट इशाराच अमित ठाकरेंनी दिला.
