मुंबईत जाण्यापूर्वी मनोज जरांगे सणावाराचे दिवस आहेत हे लक्षात घेतील, अमृता फडणवीस यांच्या अपेक्षा

यापूर्वी अमृता फडणवीस यांनी मनोज जरांगे यांना जेवणाचे निमंत्रण दिले होते. त्यानंतर मनोज जरांगे यांनी जेवणासाठी जाण्याची ही वेळ नव्हे, आमचे आंदोलन सुरू आहे. भाऊबीजेला साडीचोळी घेऊन अमृता फडणवीस यांच्याकडे जाऊ असे उत्तर दिले होते. या संदर्भात बोलताना अमृता फडणवीस यांनी, मनोज जरांगे आमच्याकडे जेवणासाठी येतील त्याची मी वाट पहात पहात आहे, असे उत्तर दिले.

मराठा आरक्षणावर प्रश्नाकडे लक्ष वेधले असता अमृता फडणवीस यांनी थेट उत्तर देणे टाळले. त्या म्हणाल्या आरक्षणाचा विषय संवेदनशील आहे. राज्य सरकार प्रश्न सोडवण्याच्या शोधात आहे. त्यामुळे मी काही वेगळे बोलण्यापेक्षा सरकार उत्तर शोधत आहे. नवरात्रात गरबा कार्यक्रमात मुस्लिमांना प्रवेश नाकारण्याची भूमिका घेतली जात आहे, याकडे लक्ष वेधले असतात त्यांनी, मी वेगळ्या कार्यक्रमासाठी येथे आले आहे. त्यामुळे आणि यावर मी यापूर्वी उत्तर दिले आहे. त्यामुळे अधिक काही बोलणार नाही, असे स्पष्ट केले. राष्ट्रीयकृत बँका व खाजगी बँकांनी पाच दिवसाच्या आठवड्यासाठी संप जाहीर केला, या प्रश्नावर त्या म्हणाल्या आंतरराष्ट्रीय बँका शनिवार व रविवारी सुट्टी देतात. परंतु भारतातील खाजगी आणि सरकारी बँका शनिवार-रविवार सुट्टी देत नाहीत, हा धोरणात्मक निर्णय आहे, तो मिळून मिसळून घेतील.

मुख्यमंत्री महाराष्ट्राप्रती कर्तव्यनिष्ठ, याचा आनंद

मुख्यमंत्री देवेंद्र फडणवीस वारंवार दिल्लीला जात आहेत, त्यांची बढती होणार का, असा प्रश्न विचारला असता अमृता फडणवीस म्हणाल्या, देवेंद्र फडणवीस दिल्लीला जातच असतात, महाराष्ट्रासाठी खूप काही करत असतात, त्याच्या मान्यता घ्याव्या लागतात, त्यासाठी त्यांना दिल्लीला जावे लागते. महाराष्ट्रप्रती ते कर्तव्यनिष्ठ आहेत, याचा मला आनंद होतो.