गेल्या काही दिवसांपासून राज्यात कायदा सुव्यवस्थेचा मोठा प्रश्न निर्माण झाला आहे. आठवड्याभरात तीनवेळा लोकप्रतिनिधींवर जीवघेणे हल्ले झाले. यामध्ये दोघांचा मृत्यू झाला आहे. अशा प्रकरणांमुळे लोकप्रतिनिधीच सुरक्षित नसल्याची भावना लोकांमध्ये निर्माण झाली आहे. तर, दुसरीकडे ज्येष्ठ पत्रकार निखिल वागळे यांच्यावरही काल भाजपा कार्यकर्त्यांकडून हल्ला झाला. यासर्व प्रकारांमुळे गृहमंत्री देवेंद्र फडणवीस यांनी राजीनामा द्यावा, अशी मागणी जोर धरू लागली आहे. या सर्व पार्श्वभूमीवर देवेंद्र फडणवीस यांच्या पत्नी अमृता फडणवीस यांनी प्रतिक्रिया दिली आहे.

या बातमीसह सर्व प्रीमियम कंटेंट वाचण्यासाठी साइन-इन करा

काही दिवसांपूर्वी उल्हासनगरात भाजपाचे आमदार गणपत गायकवाड यांनी पोलीस ठाण्यात गोळीबार केला. याप्रकरणातील जखमी महेश गायकवाड यांची प्रकृती चिंताजनक आहे. तर, तीन दिवसांपूर्वी टोळक्याने केलेल्या गोळीबारात जखमी चाळीसगाव येथील भाजपचे माजी नगरसेवक महेंद्र ऊर्फ बाळू मोरे यांचा शनिवारी मृत्यू झाला. तसंच, गुरुवारी रात्री ठाकरे गटाचे माजी नगरसेवक अभिषेक घोसाळकर यांचीही गोळ्या झाडून हत्या करण्यात आली. एका आठवड्यात या तीन दुर्दैवी घटना घडल्याने गृहमंत्री देवेंद्र फडणवीस रडारवर आले आहेत. त्यांच्या राजीनाम्याची मागणी वाढू लागली आहे. यावर उत्तर देताना अमृता फडणवीस म्हणाल्या, “महाराष्ट्रात कायदा सुव्यवस्था राखणं गरजेचं आहे. मला पूर्णपणे खात्री आहे की देवेंद्र फडणवीस कायदा सुव्यवस्था राखण्यास तत्पर आहेत. महाराष्ट्रात पूर्णपणे लक्ष घालून शांतता राहावी याकरता ते प्रत्येक गोष्ट करतील. “

मराठीतील सर्व महाराष्ट्र बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Amruta fadnavis reacts to oppositions criticism of law and order in state under threat said i am absolutely sure that sgk
First published on: 10-02-2024 at 19:12 IST