"…तर वृक्ष तोडणं कितपत योग्य?", कुंभमेळ्यासाठी नाशिकच्या तपोवनातील वृक्षतोडीच्या वादावर अण्णा हजारेंचं भाष्य

'कुंभमेळा राष्ट्रहिताचा असला तरी वृक्ष तोडणं कितपत योग्य आहे?', असं अण्णा हजारे यांनी माध्यमांशी बोलताना म्हटलं आहे.

Anna-Hazare-On-Nashik-Tapovan-Controversy-Issue

कुंभमेळ्यासाठी नाशिकच्या तपोवनातील वृक्षतोडीच्या वादावर अण्णा हजारेंची प्रतिक्रिया, (फोटो-लोकसत्ता ग्राफिक्स टीम)

Anna Hazare On Nashik Tapovan Tree Cutting Controvercy : नाशिकमध्ये होणाऱ्या कुंभमेळ्याच्या तयारीसाठी आतापासून प्रशासनाने मोठी तयारी सुरू केली आहे. कुंभमेळ्यासाठी नाशिकमधील तपोवनातील प्रस्तावित वृक्षतोडीच्या विरोधात राज्यभरातून संतप्त प्रतिक्रिया उमटत आहेत. हजारो झाडे साधुग्रामसाठी तोडली जाणार असल्याचा दावा पर्यावरण प्रेमी करत आहेत. महापालिकेच्या या प्रस्तावित निर्णयाला पर्यावरण प्रेमींनी विरोध केला असून आंदोलनाची आक्रमक भूमिका घेतली आहे.

तसेच कुंभमेळ्यासाठी तपोवनातील प्रस्तावित वृक्षतोडीच्या वादावर अनेक राजकीय नेत्यांनीही भूमिका मांडली आहे. मात्र, तरीही सरकार वृक्षतोडीबाबत ठाम असल्याचं बोललं जात आहे. या वादावर आता जेष्ठ समाजसेवक अण्णा हजारे यांनी पहिली प्रतिक्रिया देत वृक्षतोडीला विरोध असल्याची भूमिका मांडली आहे. ‘कुंभमेळा राष्ट्रहिताचा असला तरी वृक्ष तोडणं कितपत योग्य आहे?’, असं अण्णा हजारे यांनी माध्यमांशी बोलताना म्हटलं आहे.

अण्णा हजारे काय म्हणाले?

कुंभमेळ्यासाठी नाशिकच्या तपोवनातील वृक्षतोडीच्या वादावर माध्यमांशी बोलताना अण्णा हजारे यांनी आपली भूमिका मांडली. ते म्हणाले की, “कुंभमेळा जर समाज आणि राष्ट्र हितासाठी असला तरी वृक्ष तोडणं कितपत योग्य आहे? वृक्ष तोडल्यामुळे खूप नुकसान होतं, वृक्ष तोडल्यामुळे राष्ट्राचं नुकसान होतं, प्राण्यांचं नुकसान होतं. मात्र, जर गरज असेल तर छोटी-छोटी झाडे तोडावी, पण मोठी झाडे तोडू नयेत”, असं अण्णा हजारे यांनी म्हटलं आहे.

हेही वाचा

मुख्यमंत्र्यांच्या परवानगीशिवाय मंत्र्यांना जिल्हाधिकारी, सीईओंची बैठक घेता येणार नाही…

तपोवनातील वृक्षतोडीबाबत फडणवीसांनी मांडली ‘ही’ भूमिका

नाशिकमधील कुंभमेळ्यासाठी वृक्षतोडीच्या वादावर देवेंद्र फडणवीस यांनी काही दिवसांपूर्वी भाष्य केलं होतं. फडणवीस म्हणाले होते की, “खरं तर वृक्षतोड टाळलीच पाहिजे, याबाबत काही दुमत असण्याचं कारण नाही. फक्त त्याचं राजकीयकरण करणं हे चुकीचं आहे. साधुग्रामची ही जागा कित्येक वर्षांपासून आहे. आपण त्या ठिकाणी साधुग्राम तयार करत असतो. आपण जर २०१५, २०१६ चे तेथील गुगल इमेज पाहिले तर तेथे कोणतेही झाडे नव्हते. २०१७-१८ मध्ये नाशिक महापालिकेने एक प्रस्ताव आणला की त्या ठिकाणी अतिक्रमण होत आहे, त्यामुळे आपण त्या ठिकाणी वृक्षरोपण केलं पाहिजे. तेव्हा राज्य सरकारची देखील ५० कोटी वृक्ष लागवडीची योजना सुरू होती. मग त्या अंतर्गत पण थोडा विचार न करता म्हणजे ती जागा आपल्याला परत १२ वर्षांनी वापरावी लागते याचा विचार न करता त्या ठिकाणी झाडे लावण्यात आले. ते झाडे आता मोठे झालेले आहेत. त्यामुळे लोकांनाही वाटतं की या ठिकाणी एवढे मोठे वृक्ष आहेत आणि तुम्ही ते कसे तोडता? आता प्रशासनासमोर देखील हा प्रश्न आहे की जर ते झाडे तोडले नाही तर साधुग्राम कुठे करायचं?”, असं देवेंद्र फडणवीस यांनी म्हटलं.

नाशिकमधील वृक्षतोडीच्या वादावर मार्ग काढणार?

“आपण पाहिलं की उत्तर प्रदेशातील प्रयागराजमध्ये जो कुंभमेळा होतो तो १५ हजार हेक्टरमध्ये होतो आणि आपल्याला कुंभमेळा फक्त ३५० एकरमध्ये करायचा आहे. मग असं असताना जर तेथील जमीन मिळाली नाही तर मग हा कुंभमेळा कसा होईल? आपल्या सनातन संस्कृतीमध्ये वृक्ष, पर्यावरण, नदी, याला एक विशेष महत्व आहे. आपण नदीची आराधना करणारे लोक आहोत. त्यामुळे लोकांचा हा देखील समज आहे की कुंभमेळा करता आणि वृक्ष कसे तोडता? लोकांना असं वाटणं हे योग्य आहे. त्यामुळे या वादामध्ये आपल्याला एक मधला मार्ग काढावा लागेल. ती जागा देखील आपल्याला वाचवता येईल आणि जेवढे वृक्ष वाचवता येतील तेवढे वाचवले पाहिजेत. काही वृक्ष ट्रान्सप्लांट करण्याची गरज असेल तर ते देखील केलं पाहिजे. मी प्रशासनाची जी काही चर्चा केली त्यानुसार, प्रशासनाचं असं मत आहे की कुंभमेळाही झाला पाहिजे आणि आपल्याला झाडेही जास्तीत जास्त कशा पद्धतीने वाचवता येतील याचा प्रयत्न केला पाहिजे. पण यामध्ये राजकारण करण्याचा प्रयत्न करणं योग्य नाही”,अशी भूमिका देवेंद्र फडणवीस यांनी मांडलेली आहे.