सांगली : सांगलीतील एका अल्पवयीन मुलीला जबरदस्तीने रिक्षातून नेउन लैंगिक अत्याचार करून धारदार कटरने हाताची नस कापून जिवे मारण्याचा प्रयत्न मिरजेत घडला असून या प्रकरणी पिडीतेने गुरूवारी रात्री शहर पोलीस ठाण्यात फिर्याद दाखल केली आहे. याबाबत पोलीस ठाण्यातून मिळालेल्या माहितीनुसार पिडीत सांगलीत वास्तव्यास असून संशयित तरूण प्रसाद मोतुगडे (वय २०) याने दोन दिवसापुर्वी राहत्या घरातून रिक्षाने तिला आपल्या घरी आणले. घरी आणल्यानंतर तिच्यावर बळजबरी करीत लैंगिक अत्याचार केले. यानंतर त्याने धारदार कटरने तिच्या हाताची नस कापून गळ्यावरही वार केला. यामध्ये ती गंभीर जखमी झाली असून तिच्यावर रूग्णालयात उपचार करण्यात येत आहेत. या प्रकरणी पिडीतेने संशयिताविरूध्द फिर्याद दाखल केली आहे. दरम्यान, देववाडी (ता. शिराळा) येथे राहूल भोसले या तरूणाने अल्पवयीन मुलीला लग्नाचे आमिष दाखवून बलात्कार केल्याची तक्रार पिडीतेच्या आईने शिराळा पोलीस ठाण्यात दिली. लग्नासाठी चाललेल्या चर्चेतून झालेल्या ओळखीतून संशयिताने पिडीतेवर अत्याचार केल्याचे तक्रारीत म्हटले आहे.
