Baramati By-Election Results 2026 Highlights : “निवडणुका येतात आणि जातात, पण…”, बारामतीमध्ये ऐतिहासिक विजय मिळवल्यानंतर सुनेत्रा पवारांची पोस्ट

"बारामती विधानसभा पोटनिवडणुकीत मला भरघोस मतांनी विजयी केल्याबद्दल तमाम मायबाप बारामतीकरांचे मनःपूर्वक आभार.आपण दाखवलेला विश्वास, प्रेम आणि पाठिंबा माझ्यासाठी अत्यंत मोलाचा आहे.

आदरणीय अजितदादांच्या पश्चात झालेली बारामतीची ही पहिलीच निवडणूक होती.त्यांच्या मार्गदर्शनाची आणि त्यांच्या उपस्थितीची उणीव आज प्रकर्षाने जाणवते; हा विजय माझ्यासाठी केवळ राजकीय यश नसून, आदरणीय दादांच्या कार्याला आणि त्यांच्या स्मृतींना दिलेली खरी आदरांजली आहे. अजितदादांनी महाराष्ट्रासाठी आणि बारामतीसाठी केलेले कार्य, त्यांची जनतेशी असलेली नाळ आणि विकासाची त्यांची दृष्टी आजही प्रत्येकाच्या मनात कायम आहे. त्यांचे विचार आणि संस्कारच मला पुढे जाण्याची ताकद देत आहेत. हा विजय म्हणजे त्यांच्या स्वप्नांना आणि त्यांच्या कार्याला पुढे नेण्याची जबाबदारी आहे, याची मला पूर्ण जाणीव आहे.

राष्ट्रवादी काँग्रेस पक्षाचे सर्व वरिष्ठ नेते, पदाधिकारी आणि सर्व कार्यकर्ते यांचे मनःपूर्वक आभार..!

तुमच्या अथक परिश्रमामुळेच हा विजय शक्य झाला आहे. तसेच या निवडणुकीत महायुती आणि महाविकास आघाडीतील सर्व घटक पक्ष, पाठिंबा दिलेले इतर सर्व मित्र पक्ष, विविध संस्था, संघटना यांचे मी मनःपूर्वक आभार मानते.

शिव-शाहू-फुले-आंबेडकर या महामानवांच्या विचारधारेचा वारसा जपत, आदरणीय यशवंतराव चव्हाण साहेब आणि आदरणीय अजितदादांनी दाखवलेल्या मार्गावर चालण्याचा माझा निर्धार कायम राहील.तरुणाई, शेतकरी, महिला, उद्योजक आणि समाजातील सर्वच घटकांना केंद्रस्थानी ठेवून बारामतीच्या विकासासाठी आपण सर्वजण एकत्रितपणे काम करूया.

निवडणुका येतात आणि जातात, पण बारामतीचा सलोखा आणि जिव्हाळा कायम राहिला पाहिजे. म्हणूनच कोणताही जल्लोष न करता आपण कामातूनच हा विजय साजरा करूया. बारामतीकरांनी माझ्यावर ठेवलेला विश्वास मी कधीही कमी पडू देणार नाही. आपल्या सर्वांच्या सुख-दुःखात सदैव खंबीरपणे उभी राहीन, अशी मी आपणांस खात्री देते. आपल्या सर्वांच्या आशीर्वादाने, बारामतीच्या विकासासाठी मी सदैव कटिबद्ध राहीन," अशी पोस्ट सुनेत्रा पवार यांनी केली आहे.

बारामती पोटनिवडणुकीत सुनेत्रा पवारांचा ऐतिहासिक मताधिक्याने विजय झाला आहे. या विजयानंतर उपमुख्यमंत्री एकनाथ शिंदे यांनी प्रतिक्रिया दिली आहे. "दोन लाखांहून अधिक मताधिक्याने निवडून आल्याबद्दल उपमुख्यमंत्री सुनेत्राताई पवार यांचे हार्दिक अभिनंदन. बारामतीकरांनी सुनेत्राताईंना विक्रमी मताधिक्याने विजयी करत अजितदादांना भावपूर्ण श्रद्धांजली अर्पण केली आहे. स्वर्गीय अजितदादा पवार यांनी बारामतीच्या विकासाचे आणि प्रगतीचे पाहिलेले स्वप्न सुनेत्राताई पूर्ण करतील, यात शंका नाही," अशी पोस्ट एकनाथ शिंदे यांनी केली आहे.

बारामती पोटनिवडणुकीत दहाव्या फेरीअखेर उपमुख्यमंत्री सुनेत्रा पवार यांना ८७८२८ मते मिळाली आहेत. तर दुसऱ्या क्रमांकावरील उमेदवाराला आतापर्यंत २९९ मते, तर तिसऱ्या क्रमांकावर 'नोटा' आहे. आत्तापर्यंत 'नोटा'ला २९३ मते मिळाली आहेत.

बारामती पोटनिवडणुकीत आठव्या फेरीअखेर उपमुख्यमंत्री सुनेत्रा पवार यांना ७८६२८ मते. मतमोजणीच्या अद्याप २४ फेऱ्या होणार आहेत.

बारामती पोटनिवडणुकीच्या मतमोजणीच्या आठव्या फेरअखेरची आकडेवारीही समोर आली असून, आठ फेऱ्या पूर्ण झाल्यानंतर सुनेत्रा पवार यांनी ७०६४२ मते मिळाली आहेत. तर त्यांच्या विरोधात निवडणूक लढवणारे त्यांच्या जवळपासही दिसून येत नाहीयेत. या फेरीअखेर करुणा मुंडे आणि अभिजीत बिचुकले यांना प्रत्येकी ८५ मते मिळाली आहेत.

सध्या सुनेत्रा पवार या ६९३६७ मताधिक्याने आघाडीवर आहेत. २२ उमेदवार आणि 'नोटा' यांना मिळालेली आतापर्यंतची एकूण मते १२७५ इतकी आहेत.

बारामती पोटनिवडणुकीचा निकाल जाहीर होत असतानाच सुनेत्रा पवारांनी सोशल मीडियावर एक भावनिक पोस्ट केली आहे. ज्यामध्ये त्या म्हणाल्य, "आज बारामती विधानसभा पोटनिवडणुकीचा निकाल जाहीर होत असताना आपण सर्वांनी आपल्या मतांमधून दाखवलेला विश्वास मी आदरणीय अजितदादांच्या पवित्र स्मृतींना समर्पित करते. आजचा हा निकाल जाहीर होत असताना आदरणीय दादांच्या आठवणींना उजाळा मिळाल्याने आपण सर्वजण भावूक आहोत. दादांवर जीवापाड प्रेम करणाऱ्या सर्व कार्यकर्त्यांना नम्र विनंती आहे की, या विजयाचा जल्लोष म्हणून कुणीही मिरवणुका काढू नयेत किंवा गुलाल उधळू नये. आपण संयम राखूया आणि दादांच्या विचारांना साजेसं वर्तन करूया. दादांच्या स्वप्नातील बारामती घडवण्याची संधी मला दिल्याबद्दल मी सर्व बारामतीकरांचे मनःपूर्वक आभार मानते. हा शेवट नाही, ही तर फक्त सुरुवात आहे. निर्धाराची, संघर्षाची आणि नव्या बारामतीची!"

बारामती पोटनिवडणुकीत सहाव्या फेरी अखेर उपमुख्यमंत्री सुनेत्रा पवार यांना ५३४७८ मते मिळाली आहेत. तर न्यू राष्ट्रीय समाज पार्टीचे आर. वाय घुटुकडे यांना २२८ मते, हिंदुस्तान जनता पार्टीचे सतिश कदम यांना ४७ तर करुणा मुंडे यांना ६८, अभिजीत बिचुकले यांना ६५ मते मिळाली आहेत.

बारामती विधानसभा पोटनिवडणुकीच्या निकालात उपमुख्यमंत्री सुनेत्रा पवार यांनी मोठी आघाडी घेतली आहे. तिसऱ्या फेरीअखेर २६ हजारांहून अधिक मतांनी आघाडीवर असलेल्या सुनेत्रा पवार यांनी ही निवडणूक 'अजितदादांच्या स्मृतीस' समर्पित केली आहे. ...अधिक वाचा

बारामती पोटनिवडणुकीत तिसऱ्या फेरीअखेर राज्याच्या उपमुख्यमंत्री सुनेत्रा पवार यांना २६७७३ मते मिळाली आहेत. त्यामुळे या निवडणुकीत सुनेत्रा पवार यांची निर्णायक आघाडी घेतल्याचे दिसून येत आहे.

राहुरी पोटनिवडणुकीत सध्या भाजपाचे उमेदवार अक्षय कर्डिले हे आघाडीवर आहेत... या पोटनिवडणूक निकालाच्या सर्व अपडेट्स येथे वाचा एका क्लिकवर...

बारामती विधानसभा पोटनिवडणुकीसाठी आज मतमोजणी पार पडत आहे. काही वेळापूर्वी स्ट्राँग रूम उघडण्यात आली असून, या स्ट्राँग रूममधून आता २० ईव्हीएम मतपेट्या मोजणीसाठी घेण्यात आल्या आहेत. दरम्यान मतमोजणीमध्ये उपमुख्यमंत्री सुनेत्रा पवार दुसऱ्या फेरीअखेर १६५४३ मतांनी आघाडीवर आहेत.

बारामती पोटनिवडणुकीच्या मतमोजणीस सुरुवात झाली असून लवकरच निकाल सर्वांसमोर येणार आहे. या पार्श्वभूमीवर दिवंगत उपमुख्यमंत्री अजित पवार यांचा मताधिक्याचा विक्रम सुनेत्रा पवार मोडणार का याकडे सर्वांचे लक्ष लागले आहे.... वाचा सविस्तर वृत्त

बारामती विधानसभा पोटनिवडणुकीची मतमोजणी सुरू झाली आहे. टपाली मतदान आणि मतमोजणीची पहिली फेरी पूर्ण झाली असून पहिल्या फेरीअखेर उपमुख्यमंत्री सुनेत्रा पवार यांनी ६५०० मतांची आघाडी घेतली आहे. बारामती पोटनिवडणुकीसाठी मतदारांमध्ये निरुत्साह राहिल्याने सुमारे ५८.२७ टक्के मतदारांनी मतदानाचा हक्क बजावला आहे.

बारामती पोटनिवडणूकीच्या मतमोजणीला सुरुवात झाली असून सुरुवातीचे कल हाती येऊ लागले आहेत. त्यानुसार पोस्टल मतांमध्ये उपमुख्यमंत्री सुनेत्रा पवार यांनी आघाडी घेतल्याची माहिती मिळत आहे.