सांगली : विक्रीसाठी तयार झालेल्या द्राक्ष बागेवर एका रात्रीत वटवाघळांच्या झुंडीने हल्ला करत बागेतील दहा टन द्राक्षे फस्त करण्याची घटना तासगाव तालुक्यातील हातनूर येथे घडली. या घटनेनंतर कृषी विभागाच्या अधिकाऱ्यांनी बागेत जाऊन नुकसानीचा पंचनामा केला.
हातनूर येथे विठ्ठल पाटील यांची एक एकर सुपर सोनाका जातीची द्राक्षबाग आहेत. हंगामाच्या सुरुवातीला दर चांगला लाभेल या आशेवर त्यांनी आगाप फळछाटणी घेतली होती. आता माल तयार झाला असून येत्या चार दिवसांत मालाची विक्री करण्याची तयारी सुरू होती. यातच सोमवारी रात्री द्राक्ष बागेवर शेकडो वटवाघळांनी हल्ला चढवत एका रात्रीत बागेतील द्राक्षे फस्त केली. सुमारे आठ ते दहा टन माल निघेल अशी स्थिती होती. वटवाघळांनी बागेतील सर्व तयार माल फस्त केल्याने सुमारे आठ लाखांचे नुकसान झाले आहे.
u
वटवाघळांनी द्राक्ष बागेचे नुकसान केल्याची माहिती मिळताच तालुका कृषी अधिकारी अनिल फोंडे, मंडल कृषी अधिकारी बजरंग कोर्टे, पर्यवेक्षक कदम, तलाठी पतंग माने, मंडळ निरीक्षक नीलेश भांबोरे, ग्रामसेवक जालिंदर मोहिते आदींनी पाहणी केली. यावेळी माजी जिल्हा परिषद सदस्य मोहन आण्णा पाटील, अजय पाटील, बंडू पाटील आदी उपस्थित होते. कृषी विभागाच्या पथकाने नुकसानीचा पंचनामा केला असून तसा अहवाल वरिष्ठ कार्यालयाकडे पाठविण्यात येणार असल्याचे सांगितले.
