सत्तेच्या मस्तीत महायुतीला पराभव अशक्य वाटतो; पण जनतेचा रोष उसळतोय ; आमदार भास्कर जाधवांचा सत्ताधा-यांवर टीका

कोकणातील जागा शिवसेनेच्या हक्काच्या

स्थानिक स्वराज्य संस्थांमधील अनेक जागा या मूळतः शिवसेनेच्या हक्काच्या असल्याचा दावा करत जाधव म्हणाले की, स्वर्गीय अनंत तरे हे त्या जागांवर सातत्याने निवडून येत होते. मात्र, सध्याच्या राजकारणात मूळ कार्यकर्त्यांपेक्षा घराणेशाहीला अधिक महत्त्व दिले जात असल्याचा टोला त्यांनी लगावला.

तटकरे फक्त कुटुंबापुरतेच मर्यादित

सुनील तटकरे यांच्यावर थेट निशाणा साधताना जाधव म्हणाले, “तटकरे यांनी स्थानिक स्वराज्य संस्था बळकट करण्यासाठी ठोस प्रयत्न केले नाहीत. त्यांनी केवळ आपल्या कुटुंबातील उमेदवारांना निवडून आणण्यावर भर दिला. सामान्य कार्यकर्त्यांसाठी त्यांनी विशेष मेहनत घेतल्याचे कधी दिसून आले नाही.”

सत्ताधाऱ्यांना पराभव अशक्य वाटू लागला

महायुती सरकारवर टीका करताना जाधव म्हणाले की, “महाराष्ट्र आणि देशातील सत्ताधाऱ्यांना आता आपल्याला कोणीही हरवू शकत नाही, असा भयंकर भ्रम झाला आहे. मात्र, जनता सर्व पाहत आहे. सरकारविरोधातील नाराजी आता हळूहळू उघडपणे समोर येऊ लागली आहे.”
त्यांच्या या वक्तव्यामुळे आगामी निवडणुकांपूर्वी राज्यातील राजकीय संघर्ष अधिक तीव्र होण्याची चिन्हे दिसत आहेत.

ई-गाड्यांच्या खरेदीत काळा पैसा पांढरा करण्याचा डाव?

आमदार आणि मंत्र्यांसाठी सरकारी खर्चातून इलेक्ट्रिक गाड्या खरेदी करण्याच्या निर्णयावरही भास्कर जाधव यांनी कडाडून विरोध दर्शवला. या व्यवहारात मोठ्या गैरव्यवहाराचा संशय व्यक्त करत त्यांनी सरकारवर गंभीर आरोप केले.
“गुवाहाटीला गेलेल्या आमदारांकडे आधीच कोट्यवधींच्या महागड्या गाड्या आहेत. तरीही नवीन इलेक्ट्रिक गाड्या खरेदी करण्याचा घाट घातला जात आहे. या वाहन खरेदीच्या माध्यमातून काळा पैसा पांढरा करण्याची नामी संधी निर्माण केली जात आहे,” असा खळबळजनक आरोप जाधव यांनी केला.

जनतेच्या पैशांवर सत्ताधाऱ्यांची उधळपट्टी

राज्यात महागाई, बेरोजगारी आणि शेतकरी प्रश्न गंभीर असताना सत्ताधारी मात्र स्वतःच्या सुविधांवर कोट्यवधी खर्च करत असल्याची टीकाही त्यांनी केली. जाधव यांच्या या आक्रमक भूमिकेमुळे कोकणातील राजकीय वातावरण आणखी तापण्याची शक्यता व्यक्त होत आहे.