रत्नागिरी : भारतीय जनता पक्षाच्या दक्षिण रत्नागिरीचे माजी जिल्हाध्यक्ष तथा पक्षाचे ज्येष्ठ नेते राजेश सावंत यांचे बुधवारी हृदयविकाराच्या तीव्र धक्क्याने दुर्दैवी निधन झाले. त्यांच्या निधनाच्या वृत्ताने रत्नागिरीसह संपूर्ण कोकणातील राजकीय, सामाजिक आणि कार्यकर्त्यांच्या वर्तुळात मोठी शोककळा पसरली आहे. एक खंबीर, अभ्यासू आणि कार्यकर्त्यांना सतत प्रेरणा देणारे नेतृत्व हरपल्याची भावना सर्व स्तरांतून व्यक्त होत आहे.
मिळालेल्या माहितीनुसार, राजेश सावंत हे कोल्हापूरहून रत्नागिरीकडे परत येत असताना पाली परिसरात त्यांना अचानक तीव्र हृदयविकाराचा झटका आला. त्यानंतर त्यांना तातडीने वैद्यकीय मदत मिळवून देण्याचे प्रयत्न करण्यात आले. मात्र उपचारांपूर्वीच त्यांची प्राणज्योत मालवली. या अनपेक्षित घटनेने त्यांच्या कुटुंबीयांसह सहकारी आणि असंख्य कार्यकर्त्यांवर दुःखाचा डोंगर कोसळला आहे.
राजेश सावंत यांनी भारतीय जनता पक्षाच्या संघटनात्मक बांधणीत महत्त्वपूर्ण भूमिका बजावली होती. दक्षिण रत्नागिरीचे जिल्हाध्यक्ष म्हणून कार्यरत असताना त्यांनी पक्षाची मुळे ग्रामीण भागापर्यंत रुजवली. सामान्य कार्यकर्त्याला बळ देणे, प्रत्येकाशी आत्मीयतेने संवाद साधणे आणि संघटन मजबूत करण्यासाठी सातत्याने प्रयत्न करणे, ही त्यांची कार्यशैली होती. स्पष्टवक्तेपणा, निर्णयक्षमता आणि लोकांशी असलेले जिव्हाळ्याचे संबंध यामुळे त्यांनी पक्षात तसेच जनमानसात वेगळा ठसा उमटवला होता.
राजकीय जबाबदाऱ्यांसोबतच सामाजिक कार्यातही त्यांचा सक्रिय सहभाग होता. विविध सामाजिक उपक्रम, जनसंपर्क आणि विकासाभिमुख भूमिकेमुळे त्यांनी अनेकांच्या मनात आदराचे स्थान मिळवले. त्यांच्या नेतृत्वाखाली अनेक कार्यकर्ते राजकारणात घडले असून त्यांच्यासाठी ते मार्गदर्शक आणि आधारवड होते.
त्यांच्या निधनाची बातमी समजताच विविध राजकीय पक्षांचे नेते, लोकप्रतिनिधी, पदाधिकारी आणि सामाजिक क्षेत्रातील मान्यवरांनी तीव्र दुःख व्यक्त करत त्यांना भावपूर्ण श्रद्धांजली अर्पण केली. सामाजिक माध्यमांवरही शोकसंदेशांचा ओघ सुरू असून त्यांच्या कार्याचा गौरव करणाऱ्या आठवणींना उजाळा दिला जात आहे.
राजेश सावंत हे पालकमंत्री उदय सामंत यांचे विश्वासू सहकारी होते. मात्र अंतर्गत वादामुळे त्यांनी शिवसेना सोडून भाजपमध्ये प्रवेश केला. नगरपालिका निवडणुकीत सावंत यांनी महत्वाची भूमिका बजावली होती. मात्र त्यांच्यावर झालेल्या आरोपांनंतर भाजपच्या जिल्हाध्यक्ष पदाचा राजीनामा देवून अलिप्त राहण्याचे ठरविले. भाजपातील एक प्रभावी नेतृत्त्व म्हणून त्यांची आज ही ओळख कायम राहिली आहे. राजेश सावंत यांच्या पश्चात कुटुंबीयांसह मोठा मित्रपरिवार आणि असंख्य कार्यकर्ते असा परिवार आहे. गुरुवारी त्यांच्या मूळ गावी अत्यंत शोकाकुल वातावरणात अंत्यसंस्कार करण्यात येणार असल्याची माहिती कुटुंबीयांनी दिली आहे. त्यांच्या अकाली निधनाने रत्नागिरीच्या राजकीय क्षेत्रातील एक अनुभवी, संयमी आणि लोकाभिमुख नेतृत्व कायमचे काळाच्या पडद्याआड गेले असून त्यांच्या कार्याची उणीव दीर्घकाळ जाणवत राहील.
