भटके कुत्रे आणि बिबट्यांच्या दहशतीबद्दल विधानसभेत चिंता; प्राणीमित्रांच्या घरी कुत्री सोडण्याची सूचना

भटक्या कुत्र्यांच्या प्रश्नावर अधिवेशन काळात आमदारांची बैठक बोलाविली जाईल, असे आश्वासन महसूल मंत्री चंद्रशेखर बावनकुळे यांनी दिले

(संग्रहित छायाचित्र)

मुंबई : भटके कुत्रे आणि बिबट्यांच्या वाढत्या दहशतीबद्दल विधानसभेत लक्षवेधी सूचनांवरील चर्चेत तीव्र चिंता व्यक्त करण्यात आली. प्राणीमित्रांना कुत्र्यांचा कळवळा असेल, तर त्यांच्या घरी कुत्री सोडा, अशी सूचना भाजपचे भोसरीचे आमदार महेश लांडगे विधानसभेतील चर्चेत केली.

तर आमदार गल्लीबोळात फिरत असताना भटकी कुत्री मागे लागतात, अशी तक्रार शिवसेना (उद्वव ठाकरे) आमदार सुनील प्रभू यांनी केली. भटक्या कुत्र्यांच्या प्रश्नावर अधिवेशन काळात आमदारांची बैठक बोलाविली जाईल, असे आश्वासन महसूल मंत्री चंद्रशेखर बावनकुळे यांनी दिले. तर बिबट्यांच्या नसबंदीसाठी केंद्राकडे परवानगी मागितली जाईल, असे वन मंत्री गणेश नाईक यांनी सभागृहात सांगितले.

अतुल भातखळकर, चेतन तुपे आदींनी मुंबईसह राज्यातील भटक्या कुत्र्यांच्या समस्येवर तर जितेंद्र आव्हाड, काशिनाथ दाते आदींनी बिबट्यांच्या दहशतीचा मुद्दा लक्षवेधी सूचनांच्या माध्यमातून विधानसभेत उपस्थित केला होता. राज्यातील २९ महापालिकांच्या क्षेत्रात ११ लाख ८८हजार २८१ भटकी कुत्री असून निर्बिजीकरण केंद्रांची संख्या १०५ आहेत, तर मुंबईत ९० हजार ७५७ भटकी कुत्री असून निर्बिजीकरण केंद्रांची संख्या केवळ ८ आहे.

त्यामुळे एका केंद्रावर १० हजाराहून अधिक कुत्र्यांचे निर्बिजीकरण करावे लागत आहे. त्यामुळे भटक्या कुत्र्यांसाठी निवारा केंद्रे उभारण्याकरिता मुंबई महापालिकेने जागा उपलब्ध करुन द्यावी व युद्धपातळीवर तात्पुरती निवारा केंद्रे सुरु करावीत, अशी मागणी आमदार अतुल भातखळकर यांनी केली.

हेही वाचा

“विधानसभा अध्यक्षांनी कुणाला न विचारताच थेट…”, सुप्रिया सुळेंनी लोकसभेत व्यक्त केला संताप; म्हणाल्या, “मला तर…”

भटक्या कुत्र्यांबाबत कळवळा असलेले प्राणीमित्र घरी कुत्री सांभाळत नाहीत. कुत्र्याचा चावा कसा असतो, हे त्यांना माहीत नाही. त्यामुळे त्यांच्या घरी भटकी कुत्री सोडावी, अशी सूचना लांडगे यांनी केली. देशभरातील भटक्या कुत्र्यांच्या समस्येची सर्वोच्च न्यायालयाने दखल घेवून सहा उपाययोजना करण्याचे निर्देश राज्यांना देण्यात आले आहेत.

मुख्य सचिवांनाही न्यायालयात बोलाविण्यात आले होते. भटक्या कुत्र्यांसाठी निवारा केंद्रे उभारण्याचे निर्देश असून प्रादेशिक व राज्य स्तरावर समन्वयासाठी नोडल अधिकारी नियुक्त करण्यात आले आहेत. न्यायालयाच्या आदेशानुसार कार्यवाही करण्यात येत असल्याचे नगरविकास राज्यमंत्री माधुरी मिसाळ यांनी सभागृहात सांगितले. भटक्या कुत्र्यांच्या समस्येबाबत अन्य सदस्यांनीही तक्रारी केल्या. तेव्हा यासंदर्भात उपमुख्यमंत्री एकनाथ शिंदे, ग्रामविकास मंत्री जयकुमार गोरे आणि संबंधित खात्यांचे अधिकारी व आमदारांची बैठक या आठवड्यात बोलाविण्यात येईल, असे बावनकुळे यांनी सांगितले.

बिबट्यांच्या निर्बिजीकरणाबाबत केंद्राकडे प्रस्ताव

बिबट्यांच्या संख्येच्या नियंत्रणाची बाब केंद्र सरकारच्या अखत्यारित असल्याने निर्बिजीकरणासाठी केंद्राकडे प्रस्ताव पाठविण्यात येईल, असे वनमंत्री गणेश नाईक यांनी विधानसभेत सांगितले. २०२३-२४ आणि त्यानंतरच्या काळात आजपर्यंत बिबट्यांच्या हल्ल्यात ६७ जणांचा मृत्यू झाला आहे. डॉ. शामाप्रसाद मुखर्जी जन वन विकास योजनेअंतर्गत बिबट्यांचा वावर असलेल्या परिसरात घरे, गोठे, इमारतींभोवती सौर कुंपण उभारण्यासाठी १०० कोटी रुपये निधी देण्यात येणार आहे. जुन्नर विभागात बिबटे पकडण्यासाठी एक हजार पिंजरे बसविण्यात येणार आहेत, यासह अन्य उपाययोजनांबाबत नाईक यांनी माहिती दिली.