दिल्ली-मुंबई औद्योगिक कॉरीडॉर प्रकल्पामध्ये सहभागी होण्यास राज्य शासनाने मान्यता दिली असून त्या संबंधिच्या कराराच्या मसुद्याला मान्यता देण्याचा निर्णय आजच्या मंत्रिमंडळ बैठकीत घेण्यात आला.या कॉरीडॉरची लांबी एक हजार ४८२ किलोमीटर असून, सात राज्ये यात सहभागी आहेत. या प्रकल्पाअंतर्गत महाराष्ट्रामधील शेंद्रा-बिडकीन, दिघी,इगतपुरी-सिन्नर आणि धुळे-नरडाणा या ठिकाणी विकास केंद्रे निर्माण करण्यात येतील. पहिल्या तीन टप्प्यात शेंद्रा आणि दिघी अशा ७१ हजार ४५१ कोटी रूपयांच्या प्रकल्पाचे काम सुरू झाले असून, शेंद्रा येथे ३२०० हेक्टरचे भूसंपादन पूर्ण झाले आहे. औरंगाबाद-नाशिक जलदगती मार्ग, कराड-संगमेश्वर भुयारी रस्ता, शेंद्रा-बिडकीन पाणीपुरवठा योजना, शेंद्रा येथे प्रदर्शन केंद्र व लॉजिस्टीक पार्क तसेच आवश्यकतेनुसार नव्या स्मार्ट सिटीज उभारण्यात येतील. भविष्यात या अंतर्गत औद्योगिक शहरे स्थापन केली जाणार आहेत.
