CM Devendra Fadnavis : कल्याण-डोंबिवलीतील मनसे-शिंदे सेनेच्या युतीवर फडणवीसांचं भाष्य; म्हणाले, “मुंबईत…”

दरम्यान, कल्याण-डोंबिवली महानगरपालिकेत घडलेल्या या घडामोडींवर मुख्यमंत्री देवेंद्र फडणवीस यांनी दावोसमधून एका वाक्यात प्रतिक्रिया दिली आहे. ‘महाराष्ट्रात आल्यानंतर मुंबईत जे करार झालेत त्यावर उत्तर देईन’, असं सूचक भाष्य देवेंद्र फडणवीस यांनी केलं आहे.

मुख्यमंत्री देवेंद्र फडणवीस काय म्हणाले?

कल्याण-डोंबिवलीत मनसे आणि शिंदेंच्या शिवसेनेची युती झाली आहे. त्यावर तुमची प्रतिक्रिया काय? असा प्रश्न पत्रकारांनी मुख्यमंत्री देवेंद्र फडणवीस यांना विचारला. यावर मुख्यमंत्री देवेंद्र फडणवीस यांनी एका वाक्यात उत्तर दिलं. ते म्हणाले की, “मी सध्या दावोसमधील गुंतवणुकीवर फोकस करत आहे. महाराष्ट्रात आल्यानंतर मुंबईत जे करार झालेत त्यासंदर्भातील माहिती देईन”, असं म्हणत देवेंद्र फडणवीस यांनी अधिक बोलणं टाळलं.

“… म्हणून मनसेचा महायुतीला पाठिंबा”, एकनाथ शिंदेंनी सांगितलं युतीचं कारण

कल्याण-डोंबिवली महानगरपालिकेत मनसेच्या पाच नगरसेवकांनी शिवसेनेला (शिंदे) पाठिंबा दिल्यानंतर शिवसेना (शिंदे) भाजपाला बाजूना ठेवून स्वबळावर सत्ता स्थापन करणार असल्याची चर्चा आहे. यावर आता एकनाथ शिंदे यांनी केडीएमसीतील राजकीय विषयांवर भाष्य केलं. मनसेच्या पाठिंब्याबाबत बोलत असताना एकनाथ शिंदे म्हणाले, “मनसेने कल्याण-डोंबिवलीमधील विकासासाठी शिवसेनेला पाठिंबा दिला आहे. यापूर्वीही लोकसभा आणि विधानसभा निवडणुकीत मनसे पक्ष आमच्याबरोबर (महायुती) होता. भाजपा आणि शिवसेनेची (शिंदे) युती आजची नाही. या युतीत आता मनसेचाही सहभाग झाला आहे. आम्ही महायुतीतच सत्ता स्थापन करणार आहोत.”