माउलींच्या रिंगणाला पावसाची साथ ; उत्साह कायम, वारकऱ्यांना विठुरायाच्या दर्शनाची आस

गुरुवारी माउलींची आणि सोपानदेव यांची बंधुभेट होऊन पालखी भंडीशेगाव येथे मुक्कामी असणार आहे.

माउलींच्या रिंगणाला पावसाची साथ ; उत्साह कायम, वारकऱ्यांना विठुरायाच्या दर्शनाची आस
खुडूस फाटा येथील माउलींच्या गोल रिंगणात धावलेला अश्व, तर दुसऱ्या छायाचित्रात माळीनगर येथील संत तुकाराम महाराज पालखीचे रंगलेले उभे रिंगण.

मंदार लोहोकरे, लोकसत्ता

पंढरपूर : ‘बोला पुंडलिक वरदे हरी विठ्ठल श्री ज्ञानदेव, तुकाराम, पंढरीनाथ महाराज की जय’ च्या जयघोषाने खुडूस येथे माउलींच्या पालखीचे रिंगण पार पडले. या रिंगण सोहळय़ास पावसाची साथ मिळाली. मात्र भाविकांचा उत्साह तसूभरही कमी झाला नाही. दुसरीकडे तुकोबारायांच्या पालखीचे माळीनगर येथे उभे रिंगण संपन्न झाले.  गुरुवारी माउलींची आणि सोपानदेव यांची बंधुभेट होऊन पालखी भंडीशेगाव येथे मुक्कामी असणार आहे. तर संत तुकाराम महाराज यांच्या पालखीचा प्रवेश पंढरपूर तालुक्यातील पिराची कुरोली येथे राहणार आहे. आता भाविकांना सावळय़ा विठुरायाच्या दर्शनाची आस लागली आहे.

माउलींच्या पालखीने माळशिरस येथून प्रस्थान ठेवून खुडूस फाटा येथे सकाळी पोहोचली. येथील मैदानावर माउलींच्या पालखीचे दुसरे रिंगण संपन्न झाले. भव्य मैदानावर भाविकांची गोलाकार गर्दी दिसून आली. हातात भगवी पताका, टाळ-मृदुंगाचा, हरिनामाचा जयघोष आणि रिंगण सोहळा पाहण्याची उत्सुकता भाविकांना लागली होती. रिंगणाच्या ठिकाणी माउलींची पालखी विराजमान झाली. त्या नंतर माउलींचे अश्व आले.

चोपदाराने इशारा करताच उपस्थित भाविकांनी बोला पुंडलिक वरदेचा जयघोष केला. टाळ-मृदुंग आणि माउली माउलीच्या जयजयकाराने आसमंत दुमदुमून निघाले. आणि अश्वाने गोल फेरी पूर्ण केली. रिंगण झाल्यावर काही वेळ पावसाने हजेरी लावली.

दुसरीकडे जगद्गुरू तुकारम महारज यांच्या पालखीने अकलूज येथून प्रस्थान ठेवले आणि पालखी माळीनगर येथे पोहोचली. या ठिकाणी उभे रिंगण पार पडले. तुकोबारायांचा नगारखाना त्या नंतर पालखी आणि पाठोपाठ अश्व आले.

दुतर्फा भाविकांनी रांगा लावल्या होत्या. विठ्ठल विठ्ठलच्या जयघोषात अश्वाने उभी दौड पूर्ण करून पालखीला नमस्कार करून रिंगण सोहळा संपन्न झाला. या नंतर  खेळ खेळून भाविकांनी मनमुराद आनंद घेतला. या नंतर पालखी बोरगाव येथे मुक्कामी पोहोचली.

ठाकुरबुवा समाधी येथे तिसरे रिंगण : गुरुवारी पालखी पंढरपूर तालुक्यात प्रवेश करून पिराची कुरोली येथे मुक्कामी असणार आहे. तर माउलींची पालखी वेळापूर येथून प्रस्थान ठेवून ठाकुरबुवा समाधी येथे तिसरे गोल रिंगण आणि टप्पा येथे संत सोपानदेव यांची बंधुभेट करून भंडीशेगाव येथे मुक्कमी असणार आहे.

मराठीतील सर्व महाराष्ट्र ( Maharashtra ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Next Story
राज्यात ५४ ‘मीटर रिडिंग एजन्सी’ बडतर्फ ! ; तरीही महावितरणकडून ‘एजन्सी’चा आग्रह
ताज्या बातम्या
फोटो गॅलरी