कोकणात ‘पहिल्या हापूस’ची चाहूल; देवगडचा आंबा रत्नागिरीत दाखल

कोकणच्या राजाची चाहूल लागली असून देवगडचा पहिला हापूस रत्नागिरीच्या बाजारपेठेत दाखल झाला आहे. निसर्गाच्या लहरीपणावर मात करून आलेल्या या पहिल्या हापूसला प्रति डझन ४ ते ६ हजार रुपयांचा विक्रमी दर मिळत आहे.

first-devgad-alphonso-mango-arrives-in-ratnagiri-market-check-prices-per-dozen

हापूसचे आगमन! रत्नागिरीत देवगडच्या पहिल्या आंबा पेटीचे पूजन; ४ ते ६ हजार रुपये प्रति डझन दर. (छायाचित्र:लोकसत्ता टीम)

रत्नागिरी : कोकणचा राजा म्हणून ओळखल्या जाणाऱ्या हापूस आंब्याची आतुरतेने वाट पाहणाऱ्या खवय्यांसाठी दिलासादायक बातमी आहे. निसर्गाच्या लहरीपणामुळे यंदा आंबा पीक संकटात असतानाच, देवगड (जि. सिंधुदुर्ग) येथील एका प्रयोगशील शेतकऱ्याने जतन केलेला हंगामातील ‘पहिला हापूस’ रत्नागिरीच्या बाजारपेठेत दाखल झाला आहे.

यंदा पावसाळा लांबल्याने तसेच हवामानातील बदलांमुळे कोकणातील अनेक भागांत आंब्याचा मोहर करपला. मात्र, देवगडमधील एका शेतकऱ्याने ऑक्टोबर महिन्यात आलेल्या फुलोऱ्याची विशेष काळजी घेतली. कडाक्याची थंडी आणि त्यानंतर वाढलेल्या उष्म्याचा परिणाम सहन करत हा आंबा पूर्णपणे तयार झाला असून विक्रीसाठी उपलब्ध झाला आहे.

रत्नागिरीतील गोखले नाका येथील प्रसिद्ध आंबा विक्रेते सतीश पवार यांच्या स्टॉलवर हा पहिला हापूस विक्रीसाठी आला आहे. गेल्या दोन पिढ्यांपासून आंबा व्यवसायात असलेल्या पवार यांनी परंपरेनुसार पहिल्या आंबा पेटीचे पूजन करून विक्रीला सुरुवात केली. विशेष म्हणजे, रत्नागिरीच्या हापूसपूर्वी देवगडचा हापूस बाजारात आल्याने व्यापारी आणि ग्राहकांमध्ये चर्चेला उधाण आले आहे.

हेही वाचा

MSRTC ST Bus Update: राज्यभर पुन्हा ‘एसटी’ बंद राहणार… कर्मचारी आक्रमक

हंगामातील पहिलाच आंबा असल्याने दरही चढे आहेत. पूस आंब्याला ४ ते ५ डझनच्या पेटीतील आंब्यासाठी प्रति डझन ४,००० ते ६,००० रुपये असा विक्रमी दर मिळत आहे. तसेच ‘रत्ना हापूस’ (बिटकी) ही जातही विक्रीसाठी उपलब्ध असून तिचा दर प्रति डझन ७५० रुपये आहे.

गेल्या वर्षी नोव्हेंबरपर्यंत पाऊस सुरू राहिल्याने अपेक्षित ‘ऑक्टोबर हिट’ जाणवली नाही. डिसेंबर आणि जानेवारीतील कडाक्याच्या थंडीमुळे फळधारणा होण्याऐवजी मोहर करपण्याचे प्रमाण वाढले. सध्या वाढलेल्या तापमानामुळे नव्या मोहराची प्रक्रिया सुरू झाली असून, एप्रिल–मे महिन्यांत मोठ्या प्रमाणावर आंबा बाजारात येईल, अशी आशा उत्पादकांनी व्यक्त केली आहे.