निविदा मंजुरीच्या कारणावरून राडा सांगली : निविदा मंजुरीच्या कारणावरून रात्री अध्यक्ष निवासात झालेल्या राडय़ानंतर जिल्हा परिषदेची सर्वसाधारण सभा गणपूर्तीअभावी मंगळवारी तहकूब करण्यात आली. निधीवाटपावरून धुमसत असलेला वाद हातघाईवर आल्याने रात्री अध्यक्ष निवासात शिवीगाळ, खुच्र्याची फेकाफेकीही झाली होती. परस्परविरोधी तक्रारी दाखल झाल्यानंतर वरिष्ठ नेत्यांनी हस्तक्षेप केल्यानंतर मंगळवारी सकाळी तक्रारीही मागे घेण्यात आल्या. जिल्हा परिषदेची सर्वसाधारण सभा आज बोलावण्यात आली होती. मात्र ही सभा ऑफलाइन घ्यावी असा सदस्यांचा आग्रह होता. मात्र करोना संसर्गाच्या धोक्यामुळे सभा ऑनलाइनच घ्यावी असे प्रशासकीय धोरण आहे. या सभेत पाच कोटी खर्चाची वॉटर एटीएम बसविण्याच्या कामाची निविदा मंजुरीचा विषय होता. याशिवाय स्वीय निधी वाटपात पदाधिकारी व सदस्य यांच्यामध्ये दुजाभाव होत असल्याचा आरोप काही सदस्यांचा होता. या वादावर चर्चेसाठी अध्यक्षा प्राजक्ता कोरे यांचे पती नंदू कोरे, दीर राजू कोरे यांच्यासह तमणगोंडा रवि पाटील आदींसह प्रमोद शेंडगे, संभाजी कचरे, अरुण बालटे, सुनील पवार, सुनील पाटील आदी बसले होते. या वेळी चर्चेतून वाद वाढत गेल्याने शिवीगाळ करण्याबरोबरच मारहाण करण्यात आल्याची तक्रार अध्यक्षांचे पती नंदू कोरे यांनी केली होती. यावरून उभय बाजूंकडून परस्परविरोधी तक्रारही विश्रामबाग पोलीस ठाण्यात रात्री उशिरा देण्यात आली. मात्र, आज सकाळी नेत्यांनी हस्तक्षेप करीत या तक्रारी मागे घेण्यास भाग पाडले. दरम्यान, या वादावादीनंतर मंगळवारी होणारी सर्वसाधारण सभा गाजण्याची चिन्हे असतानाच आज सदस्यच गैरहजर राहिल्याने गणपूर्तीअभावी सभा तहकूब करण्यात येत असल्याचे अध्यक्षा श्रीमती कोरे यांनी जाहीर केले. या वेळी उपाध्यक्ष शिवाजी डोंगरे, तमणगोंडा रवि पाटील, सरदार पाटील हे मोजकेच सदस्य उपस्थित होते.