घाटघरमध्ये आजपर्यंत विक्रमी ४ हजार मिमी. पाऊस मुळा धरण ९० टक्के भरले

रतनवाडी येथे आज ८२ मिमी पावसाची नोंद झाली. तेथे आजपर्यंत ३ हजार ४४३ मिमी पावसाची नोंद झाली. अन्य ठिकाणचा आजचा आणि आज पर्यंत पडलेला पाऊस मिमीमध्ये पुढील प्रमाणे आहे. पांजरे ५७ (२ हजार ६२६), भंडारदरा ४६ (२ हजार ३२०), वाकी ४१ (१ हजार ९४९), निळवंडे ६ (९१७), अकोले १ (४३९), आढळा धरण २ (३१०).

पाणलोट क्षेत्रात काल दिवसभर पावसाच्या जोरदार सरी कोसळत होत्या. पाणलोट क्षेत्रातील धबधबे पुन्हा जोमाने कोसळत असून ओढे नाले तुडुंब भरून वहात आहेत. धरणात होणारी पाण्याची आवक वाढल्यामुळे धरणातून सुरू असणाऱ्या विसर्गात वाढ करण्यात आली. आज सकाळी भंडारदरा धरणातून ३ हजार १३५ क्युसेक विसर्ग सुरू होता.११ हजार ३९ दलघफु क्षमता असणाऱ्या धरणातील पाणीसाठा सकाळी ११ हजार दलघफू होता.

निळवंडे धरणाच्या विसर्गातही मोठी वाढ करण्यात आली असून सकाळी धरणातून ६ हजार ९०४ क्युसेक विसर्ग सुरू होता. प्रवरा नदीच्या पाणी पातळीत पुन्हा वाढ सुरू झाली आहे. ८ हजार ३२० दलघफू क्षमतेचे निळवंडे धरण जवळपास पूर्ण भरले असून सायंकाळी धरणाचा पाणी साठा ८ हजार २७१ दलघफू होता.जिल्ह्यातील सर्वाधिक क्षमता असणारे मुळा धरण ९० टक्के भरले आहे.आज सकाळी मुळा धरणाचा पाणीसाठा २३ हजार ५९० दलघफू (९०.७३ टक्के) झाला होता. धरणाच्या पाणी साठ्यात आज ४१० दशलक्ष घनफूट पाण्याची भर पडली.

कोतुळजवळ सकाळी मुळा नदीचा विसर्ग ४ हजार ७०५ क्युसेक होता. तालुक्यात असणारे चौदा लघुतलाव तुडुंब भरून वहात आहेत.
तालुक्याच्या पूर्व भागात वातावरण पावसाळी असले तरी पाऊस नाही.