पालघर शहरात गॅस वाहिनी दृष्टिपथात

नीरज राऊत, लोकसत्ता

पालघर : पालघर तालुक्यात समोर अरबी समुद्रात तेल विहिरीतून निर्मित होणारा नैसर्गिक वायू सर्वप्रथम पालघर तालुक्यातील रहिवाशांना मिळावा ही गेल्या पंधरा-वीस वर्षांपासूनची मागणी  शहरवासीयांसाठी प्रत्यक्षात दृष्टिपथात येऊन ठेपली आहे. गॅस वाहिनीद्वारे पुरवठा करणाऱ्या गुजरात गॅस कंपनीने   त्यासाठी परवानगी मागितली असून नगरपरिषदेकडून येत्या काही महिन्यांमध्ये त्याला प्रतिसाद मिळणे अपेक्षित आहे.

पालघर समुद्रकिनाऱ्यापासून सुमारे पन्नास- पंचावन्न नॉटिकल मैलावर तेल विहिरीतून निघणारा नैसर्गिक वायू वेगवेगळ्या राज्यांमध्ये पोहोचला आहे. मात्र, पालघर परिसरातील नागरिकांना घरगुती वापरासाठी नैसर्गिक इंधन (वायू) मिळाल्यास येथील नागरिकांचे जीवनमान सोयीचे होईल तसेच त्याचा वापर वाहनांमध्ये  केल्यास वायू प्रदूषण कमी होईल म्हणून विरार येथील बालरोगतज्ज्ञ डॉ. हेमंत जोशी हे सन २००२-२००३ पासून या नैसर्गिक वायूचा पालघर-वसई भागाला पुरवठा करण्याची मागणी करीत आहेत.

या मागणीच्या नंतर सामाजिक संस्था व लोकप्रतिनिधींनी सातत्याने पाठपुरावा केला. खासदार बळीराम जाधव यांच्या कारकीर्दीत ही मागणी दिल्लीदरबारी रेटून धरल्यानंतर त्याला मंजुरी देण्यात आली. निविदा काढल्यानंतर २८ ऑगस्ट २०१८ मध्ये गुजरात गॅस कंपनीला पालघर जिल्ह्यात पाइपलाइन नॅचरल गॅस (पीएनजी) वितरण करण्याचे परवानगी देण्यात आली.

कंपनीने बोर्डी गावांमध्ये मोजक्या ठिकाणी गॅस जोडणी दिली  असून वसई-विरार महापालिका क्षेत्रामध्ये गॅस पुरवठा करण्यासाठीच्या व्यवस्था उभारण्याचे काम सुरू आहे.  पालघर शहरांमध्ये वाहिनीद्वारे गॅस पुरवठा करण्यासाठी ३ मार्च रोजी संयुक्त पाहणी करण्यात आली होती. शहरात ५५.५ किलोमीटर लांबीची वाहिनी टाकण्याचे प्रस्तावित असून त्यापैकी ४२ किलोमीटर लांबीची वाहिनी नगरपरिषदेच्या अंतर्गत रस्त्याच्या कडेला टाकण्यात येणार आहे. उर्वरित  सार्वजनिक बांधकाम विभागाच्या अंतर्गत येत असल्याचे प्राथमिक पाहणीत आले आहे.  नगरपरिषदेने गॅस पुरवठय़ासाठी वाहिनी टाकण्यासाठी परवानगी मागणी करणारे पत्र प्रथम १७ जुलै रोजी पालघर नगरपरिषद दिले असून नगरपरिषदेने मागितलेली माहिती व या संदर्भात स्मरणपत्र ३ सप्टेंबर रोजी देण्यात आले आहे.

सर्वसाधारण सभेत निर्णय घेणार

गॅसवाहिनी टाकण्याबाबत नगरपरिषदेने अजून कोणताही निर्णय घेतला नसून सर्वसाधारण सभेत आल्यानंतर याबाबत निर्णय घेता येईल अशी भूमिका प्रशासनाने घेतली आहे. प्रत्यक्षात हा विषय सर्वसाधारण सभेत मंजुरीसाठी यावा याकरिता नगरसेवक व गटनेते प्रयत्नशील आहे. यासंदर्भात पालघरच्या नगराध्यक्षा डॉ. उज्वला काळे यांच्याशी संपर्क साधला असता करोना संक्रमणाच्या काळात   खोदकाम सुरू केल्यास पिण्याच्या पाण्याची जलवाहिनीतून गळती झाली असती तर इतर साथीचे रोग पसरण्याची भीती असल्याचे कारण पुढे केले आहे. तसेच नगरपरिषदेकडे तांत्रिक अधिकाऱ्यांची कमी असल्याने हा निर्णय प्रलंबित राहिल्याचे त्यांनी सांगितले. नवीन जलवाहिनी वरून जोडण्या स्थानांतरीत करणे तसेच भुयारी गटारी बाबत निर्णय घेण्याचे नगरपरिषदेला अजूनही प्रलंबित आहे, त्यामुळे   हा विषय सर्वसाधारण सभेत समोर ठेवण्याचा विचार असल्याचे नगराध्यक्षांनी ‘लोकसत्ता’ला सांगितले.