अकोला : बंदुकीच्या धाकावर दरोडेखोरांनी सहा लाखांचे दागिने लुटल्याची घटना बुलढाणा जिल्ह्यातील दरेगाव येथे मध्यरात्री घडली. घरमालकाला शौचालयात कोंडून दरोडेखोर पसार झाले. पोलिसांकडून त्यांचा शोध सुरू आहे. या घटनेमुळे परिसरात भीतीचे वातावरण पसरले आहे. दरेगाव येथील गजानन सुरेश बंगाळे हे घरी कुटुंबीयांसह झोपले असताना दरोडेखोरांनी दार वाजवले. दरवाजा उघडताच सहा ते सात जण घरात शिरले. त्यांनी पैशांची मागणी करून जीवे मारण्याची धमकी दिली. दरोडेखोरांनी मारहाण करून गावठी पिस्तूलचा धाक दाखवला. पैसे नसल्याचे सांगितल्यावर दरोडेखोरांनी आलमारीतील नेकलेस, पाटल्या, मंगळसूत्रे, अत्तरदाणी, दोन मोबाईल व ५० हजार रुपये रोख, असा एकूण सहा लाख दहा हजार रुपयांचा मुद्देमाल चोरून नेला. घरमालकाला शौचालयात हातपाय बांधून कोंडून ठेवले. माहिती मिळताच पोलिसांनी घटनास्थळावर धाव घेतली. श्वानपथकाला पाचारण करून आरोपींचा शोध घेण्यात आला. साखरखेर्डा पोलीस ठाण्यात अनोळखी आरोपींविरुद्ध विविध कलमान्वये गुन्हा दाखल करण्यात आला आहे. दरम्यान, उपविभागीय पोलीस अधिकारी विलास यामावार यांनी घटनास्थळी भेट देऊन पाहणी केली. आरोपींचा शोध सुरू असून लवकरच दरोडेखोरांना ताब्यात घेऊ, अशी माहिती पोलिसांनी दिली.
