अहिल्यानगरमधील पोलीस भरतीवर राज्य गुप्तचर विभागाचे लक्ष

जिल्हा पोलीस अधीक्षक सोमनाथ घार्गे यांनी ही माहिती दिली. सन २०२४-२५ या वर्षासाठी जिल्हा पोलीस दलासाठी भरती प्रक्रिया सुरू करण्यात आली आहे. एकूण ७३ पदे भरली जाणार आहेत. त्यासाठी उमेदवारी अर्ज दाखल करण्याची मुदत ७ डिसेंबर २०२५ पर्यंत होती. या कालावधीत ४ हजार १४८ उमेदवारांनी अर्ज केले. त्यामध्ये ८१२ महिला उमेदवारांचे अर्ज आहेत तर माजी सैनिकांचे १४२ व पुरुष उमेदवारांचे ३ हजार १९४ अर्ज आहेत.

भरतीसाठी जिल्हा पोलीस अधीक्षकांच्या अध्यक्षतेखाली अल्पसंख्यांक समाजाचा अधिकारी, जिल्हा महिला व बालविकास अधिकारी, समाजकल्याण अधिकारी, आदिवासी विकास अधिकारी, जिल्हा सैनिक कल्याण अधिकारी यांची समिती स्थापन करण्यात आली आहे.

मैदानी चाचणीचे ११ ते १४ फेब्रुवारी २०२६ दरम्यान एकूण तीन प्रकार असतील. पुरुष उमेदवारांसाठी १६०० मी., महिला उमेदवारांसाठी ८०० मी. तसेच १०० मी व गोळाफेक असे तीन प्रकार आहेत. मैदानी चाचणीचे ठिकाण शहरातील पोलीस मुख्यालय आहे.

पोलीस भरतीच्या अनुषंगाने ४५ अधिकारी, ३५०अंमलदार, ३० जिल्हा लिपिक कर्मचारी तसेच वैद्यकीय सेवेतील कर्मचारी तैनात असणार आहेत. कोणताही अनुचित प्रकार घडू नये यासाठी लाचलुचपत प्रतिबंधक विभाग व राज्य गुप्तवार्ता विभाग यांना पत्र देण्यात आले आहे. पोलीस भरतीसाठी शैक्षणिक अर्हता बारावी उत्तीर्ण अशी आहे मात्र एमई, एम फार्मसी, एमएस्सी, एमएससी (ॲग्री), एमसीएस, एमसीए, एमबीए अभ्यासक्रम पूर्ण झालेल्या उमेदवारांचे २०८ अर्ज आहेत.

जिल्हा पोलीस दलात अधिकारी व कर्मचारी असे एकूण सुमारे ३३०० संख्याबळ आहे. जिल्ह्याचा भौगोलिक विस्तार महाराष्ट्रात सर्वाधिक आहे तसेच जिल्ह्यातील लोकसंख्येचे व गुन्हे दाखल होण्याचे प्रमाण पाहता, त्या तुलनेत जिल्ह्याला आणखी पोलीस संख्याबळाची आवश्यकता भासते आहे. त्या तुलनेत केवळ ७३ पदांसाठी भरती होत आहे.