Raigad Election: रायगड महायुतीतील घटक पक्षच आमने-सामने; शिवसेना ४०, भाजप ३०, राष्ट्रवादी २९ उमेदवार मैदानात

रायगड जिल्हा परिषदेच्‍या ५९ जागांसाठी निवडणूक होते आहे. त्‍यासाठी १७३ उमेदवार निवडणूकीच्‍या रिंगणात आहेत. आता पक्षनिहाय लढतींचे चित्र स्पष्ट झाले आहे.

Raigad district sees 173 candidates contesting 59 seats, creating intense competition among local parties.

रायगड महायुतीतील घटक पक्षच आमने-सामने (छायाचित्र - लोकसत्ता टीम)

अलिबाग – उमेदवारी अर्ज मागे घेण्‍याची मुदत संपल्‍याने निवडणुकीचे चित्र स्पष्ट झाले आहे. शिवसेना शिंदे गटाने सर्वाधिक ४० उमेदवार निवडणूक रिंगणात उतरवले आहे. भाजपने ३० तर राष्ट्रवादी अजित पवार गटाने २९ उमेदवार निवडणुकीत रिंगणात आहेत. मात्र मागील निवडणुकीत २३ जागा जिंकणारा शेतकरी कामगार पक्ष यंदा १९ जागाच लढवत आहे.

रायगड जिल्हा परिषदेच्‍या ५९ जागांसाठी निवडणूक होते आहे. त्‍यासाठी १७३ उमेदवार निवडणूकीच्‍या रिंगणात आहेत. आता पक्षनिहाय लढतींचे चित्र स्पष्ट झाले आहे.महायुती आणि महाविकास आघाडीतील मतभेद या निमित्ताने उघड झाले आहेत. सत्ताधारी महायुतीमधील घटक पक्ष एकमेकांसमोर उभे ठाकले आहेत. त्यामुळे यंदाची निवडणूक अत्यंत चुरशीची ठरण्याची चिन्हे शक्यता आहे.

या निवडणुकीत शिवसेनेने उत्‍तर रायगडात भाजपबरोबर आघाडी केली आहे. तरीही शिंदेंच्‍या शिवसेनेने सर्वाधिक ४० जागांवर उमेदवार उभे केले आहेत. शिवसेनेपाठोपाठ भारतीय जनता पक्षाने ३० मतदारसंघांत आपले उमेदवार रिंगणात उतरवले आहेत. दक्षिण रायगडात भाजपबरोबर युती करणाऱ्या राष्ट्रवादी काँग्रेस पक्षाचे या निवडणूकीत २९ जागांवर उमेदवार आहेत. शेतकरी कामगार पक्ष (शेकाप) आणि शिवसेना ठाकरे गट यांनी प्रत्येकी १९ मतदारसंघांत उमेदवार उभे केले आहेत.

हेही वाचा

Alibag Crime: चोरीच्या उद्देशाने वृद्ध महिलेचा खून…अलिबागच्या चौल गावातील घटना; पोलिस पथक, फॉरेन्सिक टीम घटनास्थळी दाखल

काँग्रेस पक्षाने ९ जागांवर उमेदवार दिले असून महाराष्ट्र नवनिर्माण सेनेने ३ मतदारसंघांत आपली उपस्थिती नोंदवली आहे. वंचित बहुजन आघाडी, आम आदमी पार्टी (आप) आणि भारतीय कम्युनिस्ट पक्ष (भाकप) यांनी प्रत्येकी केवळ एका जागेवर उमेदवार उभे केल्याने या पक्षांची भूमिका मर्यादित स्वरूपाची राहिली आहे. तर २१ अपक्ष उमेदवार आपले राजकीय भवितव्‍य अजमावत आहेत.

रायगड जिल्‍हा परीषदेवर सातत्‍याने सत्‍तेत राहणाऱ्या शेतकरी कामगार पक्षाची यावेळी उमेदवार उभे करण्‍यात देखील पिछेहाट झाल्‍याचे दिसून येते. मागील‍ निवडणूकीत २३ जागा जिंकत शेकाप सत्‍तेतील प्रमुख घटक पक्ष बनला होता. विसर्जीत जिल्‍हा परीषदेत शेकापचा अध्‍यक्ष होता. पण यावेळी पक्षाला तेवढेही उमेदवार देता आलेले नाही. शेकापचे अनेक नेते, कार्यकर्ते पक्ष सोडून अन्‍य पक्षात सामील झाले. त्‍यामुळे या निवडणूकीत शेकापला उमेदवारांची शोधाशोध करावी लागली.

अपक्षांना संधी

रायगड जिल्‍हयात सक्रीय असलेल्‍या प्रमुख राजकीय पक्षांची संख्‍या जास्‍त आहे. त्‍यामुळे अपक्षांना इथल्‍या निवडणूकांमध्‍ये फारसा वाव मिळताना दिसत नाही. मात्र यावेळच्‍या निवडणूकीत २१ अपक्ष उमेदवार उभे आहेत. यात राजकीय पक्षांच्‍या बंडखोर उमेदवारांचाही समावेश आहे. हे अपक्ष उमेदवार निवडणूकीच्‍या निकालावर परीणाम करू शकतात. त्‍यातच जिल्‍हा परीषदेतील सत्‍तेसाठी ३१ चा मॅजिक फिगर गाठण्‍यासाठी सर्वच राजकीय पक्षांची चढाओढ सुरू आहे. अशावेळी सत्‍तासंघर्षात अपक्षांचाही भाव वाढण्‍याची शक्‍यता आहे.