कल्याण डोंबिवलीत राजकीय गदारोळ! उद्धव ठाकरेंच्या ४ नगरसेवकांना डांबून ठेवलं; पक्षाचे शिवसेना (शिंदे) आणि मनसेवर आरोप

कल्याण डोंबिवली महापालिकेत मनसेने एकनाथ शिंदे यांच्या शिवसेनेला पाठिंबा जाहीर केल्याने राजकीय वाद पेटला आहे.

कल्याण डोंबिवली महापालिकेत राजकीय घडामोडींना वेग आला आहे. येथे सत्ता स्थापनेबाबत मोठे राजकीय नाट्य घडताना दिसत आहे. या महापालिकेत उद्धव ठाकरे आणि राज ठाकरे या दोन बंधूंनी एकत्र येत शिवसेना (शिंदे) आणि भाजपा या पक्षांच्या विरोधात निवडणूक लढवली होती. मात्र आता मनसेच्या नगरसेवकांनी शिवसेना (शिंदे) पक्षाला पाठिंबा जाहीर केला आहे. यावरून विविध प्रश्न उपस्थित केले जात आहेत. यादरम्यान शिवसेना (ठाकरे) पक्षाचे पदाधीकारी अल्पशे भोईर यांनी त्यांच्या पक्षातील काही नगरसेवकांना डांबून ठेवल्याचा आरोप केला आहे.

शिवसेना ठाकरे) परवा आम्ही शिवसेना (ठाकरे) पक्षाच्या कल्याण डोंबिवली महापालिका नगरसेवकांचा एक गट स्थापन केला. तो गट स्थापन करत असताना सात सदस्य उपस्थित होते. पण आपल्याला माहिती आहे की, कल्याण डोंबिवली महापालिकेत शिवसेना (ठाकरे) पक्षाचे एकूण ११ नगरसेवक निवडून आले आहेत. काल मनसेचे नेते राजू पाटील यांनी जो गट स्थापन केला, त्यांची संख्या ५ होती. काल डॉक्टर श्रीकांत शिंदे यांनी मनसे आणि शिंदे गटाची युती झाल्याचे म्हटले. पण या दोघांच्या कुठल्याही वक्तव्यामध्ये शिवसेनेचे ४ निवडून आलेले नगरसेवक कुठे आहेत? कोणत्या परिस्थितीत आहेत? त्यांच्या बरोबर आहेत की नाहीत? किंवा त्यांचं काय केलं याबद्दल कुठलीही वाच्यता त्यांनी केलेले नाही.

हे चारही सदस्य आमच्या संपर्कात आहेत. ते आमच्याशी संपर्क साधण्याचा प्रयत्न करत आहेत. हे चारही सदस्य शिंदे गट आणि मनसेच्या लोकांच्या ताब्यात आहेत. ते वारंवार फोन करून हे सांगत आहेत की आम्हाला डांबून ठेवलं आहे. आमच्या मनाच्या विरूद्ध आम्हाला ठेवलं आहे. आमची शिंदे गट किंवा मसेसेबरोबर युती करण्याची आमची कोणतीही इच्छा नाही, असेही शिवसेना (ठाकरे) पक्षाचे पदाधिकारी अल्पशे भोईर यांनी माध्यमांशी बोलताना सांगितले.

पुढे बोलताना भोईर म्हणाले की, ज्या प्रकारे नगरसेवकांनी आमच्याशी संपर्क साधून त्यांची इच्छा व्यक्त केली. त्यानंतर ज्यांच्या ताब्यात आमचे नगरसेवक आहेत, त्यांनी त्या नगरसेवकांना समोर आणून त्यांची भूमिका स्पष्ट करू देणे गरजेचे आहे. आजचा दिवस आम्ही वाट पाहाणार आहोत. त्यानंतर त्यांनी जर त्यांची भूमिका स्पष्ट केली नाही, किंवा आमच्या नगरसेवकांना प्रसार माध्यमांच्या समोर आणलं नाही तर आम्ही स्थानिक पोलीस ठाण्यात आमचे नगरसेवक हरवल्याची तक्रार दाखल करणार आहोत.

हेही वाचा

कल्याण-डोंबिवलीतील राजकीय नाट्याबाबत राज ठाकरेंना माहिती होती की नाही? ठाकरे गटाचा दावा; म्हणे…

कल्याण डोंबिवली महापालिकेच्या निवडणुका भाजपाबरोबर युतीत लढणाऱ्या एकनाथ शिंदे यांच्या शिवसेनेने महापालिकेतील सत्ता स्थापनेत भाजपाचे अवलंबित्व कमी करण्याच्या दिशेने वेगाने हालचाली सुरु केल्याचे पाहायला मिळाले. एकूण १२२ जागा असलेल्या या महापालिकेत सत्ता स्थापनेसाठी ६२ नगरसेवकांचे समर्थन आवश्यक आहे. कल्याण डोंबिवली महापालिकेत शिंदे यांचा ५३ नगरसेवकांसह मोठा भाऊ ठरला असला तरी ५० जागा मिळवणारा भाजपाही त्यांच्यापासून फार दूर नाही. या पार्श्वभूमीवर मनसेच्या पाच नगरसेवकांचा पाठींबा मिळवला आहे. तसेच इतरही पक्षांकडून मदत घेण्याचे प्रयत्न सुरू असल्याचे सांगितले जात आहे. त्यामुळे येत्या काही दिवसात येथील राजकारण कसे वळण घेते हे पाहाणे महत्त्वाचे ठरणार आहे.