कराड उड्डाणपुलाला सरसेनापती हंबीरराव मोहितेंचे नाव देण्याची तळबीड; ग्रामस्थांची नागपूर येथे नितीन गडकरींकडे मागणी

​तळबीड ही पराक्रमी सरसेनापती हंबीरराव मोहिते यांची जन्मभूमी असून ती कराडपासून अवघ्या १० किलोमीटर अंतरावर आहे. छत्रपती शिवाजी महाराज आणि छत्रपती संभाजी महाराज यांच्या काळात स्वराज्याच्या रक्षणासाठी हंबीरराव मोहितेंनी दिलेले बलिदान आणि दाखवलेली असीम निष्ठा इतिहासात सुवर्ण अक्षरांनी कोरली गेली आहे. कराड शहरातील ३.४७ किलोमीटर लांबीच्या या महत्त्वाच्या उड्डाणपुलाला त्यांचे नाव दिल्यास त्यांच्या ऐतिहासिक योगदानाचा उचित सन्मान होईल, तसेच नव्या पिढीला त्यांच्या अफाट शौर्याची प्रेरणा मिळत राहील, अशी आग्रही भूमिका ग्रामस्थांनी मांडली.

​नागपूर येथील या महत्त्वपूर्ण भेटीप्रसंगी अखिल भारतीय मराठा महासंघाचे नागपूर विभाग अध्यक्ष नरेंद्र मोहिते, तळबीडचे माजी सरपंच जयवंतराव मोहिते आणि सामाजिक कार्यकर्ते हणमंत चव्हाण यांच्यासह तळबीडचे ग्रामस्थ मोठ्या संख्येने उपस्थित होते. छत्रपती शिवाजी महाराज व छत्रपती संभाजी महाराज यांच्या कार्यकाळात सरसेनापती हंबीरराव मोहिते यांनी स्वराज्याच्या सीमा विस्तारात व रक्षणात अद्वितीय पराक्रम गाजवला. तळबीडच्या मातीत घडलेल्या या महान सेनापतीने छत्रपती घराण्याशी असलेली निष्ठा शेवटच्या श्वासापर्यंत जपली. कराड परिसराच्या दृष्टीने अत्यंत महत्त्वपूर्ण असलेल्या या राष्ट्रीय महामार्गावरील पुलाला त्यांचे नाव मिळणे ही संपूर्ण सातारा जिल्ह्यासाठी आणि नव्या पिढीसाठी अभिमानाची बाब ठरणार आहे.

३.४७ किमी उड्डाणपूल ठरतोय भव्य ओळख

पुणे-बंगळूरू राष्ट्रीय महामार्ग ४८ वरील कराड शहराच्या दळणवळणात ३.४७ किलोमीटर लांबीचा सहापदरी उड्डाणपूल अत्यंत कळीची भूमिका बजावत आहे. वाहतूक कोंडी सोडवण्यासाठी उभारलेल्या या आधुनिक वास्तुला ऐतिहासिक पराक्रमाची जोड मिळावी, यासाठी तळबीड ग्रामस्थ एकवटले आहेत. केंद्रीय मंत्री नितीन गडकरी यांच्या सकारात्मक प्रतिसादामुळे या उड्डाणपुलाच्या नामकरणाचा मार्ग सुकर झाला असून संपूर्ण तालुक्यातून या उपक्रमाचे स्वागत होत आहे.