सावंतवाडी: सह्याद्रीच्या निसर्गरम्य डोंगरदऱ्यांमध्ये वसलेल्या दोडामार्ग आणि सावंतवाडी तालुक्यात दुर्मिळ होत चाललेल्या ‘किंग कोब्रा’चे (राजनाग) दर्शन पुन्हा एकदा घडले आहे. २ एप्रिल २०२६ रोजी दोडामार्ग तालुक्यातील तळकट येथे नागांचा राजा समजला जाणारा हा महाकाय किंग कोब्रा आढळून आल्याने परिसरात कुतूहल आणि निसर्गप्रेमींमध्ये उत्साहाचे वातावरण आहे.
निसर्गसंपन्नतेचे प्रतीक:
गेल्या काही दिवसांपासून दोडामार्ग आणि सावंतवाडी तालुक्यातील मोर्ले व सरमळे भागात किंग कोब्राचे दर्शन होत आहे. तळकट पाठोपाठ सरमळे आणि मोर्ले या भागातही राजनागाचा वावर असल्याचे समोर आले आहे. सह्याद्रीच्या पट्ट्यात वाढणारी जैवविविधता आणि निसर्गाचे होणारे संवर्धन यामुळेच हे दुर्मिळ जीव या भागात सुरक्षित आहेत, असे मत पर्यावरण तज्ज्ञांनी व्यक्त केले आहे.
पर्यावरणप्रेमींकडून स्वागत:
किंग कोब्रा हा मुख्यत्वे घनदाट जंगलात राहणारा साप आहे. त्याचे अस्तित्व हे त्या भागातील निसर्ग चक्र उत्तम असल्याचे निदर्शक मानले जाते. तळकट येथे झालेल्या या दर्शनामुळे निसर्गप्रेमींनी आनंद व्यक्त केला असून, या दुर्मिळ जीवांचे रक्षण करणे ही सर्वांची जबाबदारी असल्याचे आवाहन करण्यात आले आहे.
