लोकसत्ता प्रतिनिधी सांगली : सांगलीपासून आठ किलोमीटर अंतरावर कर्नाळ-नांद्रे परिसरात बिबट्याचा वावर आढळून आला असून वन विभागाने खात्री करुन लोकांना सावध राहण्याचा सल्ला दिला आहे. नावरस वाडी मधील पोलीस पाटील यांनी शनिवारी रात्री साडे नऊ वाजण्याच्या सुमारास वन विभागाला फोन करून बिबट पाहिल्याचे कळवले. कर्नाळ नांद्रे रस्त्यावरील नवीन झालेल्या पुलाच्या जवळ दोन महिलांनी बिबट पाहिला आहे. माहिती मिळताच वन विभाग चे कर्मचारी व वनपाल तुषार भोरे हे जागेवर पोचले. जागेची पाहणी केली असता बिबट या वन्य प्राण्याच्या पाऊल खुणा दिसून आल्या. या परिसरात फिरती करताना बिबट्याचे दर्शन वन विभागाच्या कर्मचाऱ्यांना झाले. ३ ते ४ वर्ष वयाचा बिबट समक्ष पाहिल्याचे वन विभागाने पोलीस पाटील व इतरांना सांगितले . बिबट त्याच्या त्याच्या मार्गाने निघून जाई पर्यत वन विभाग थांबून होते.तो तिथून निघून गेल्या नंतर वन विभाग माघारी गेले. आणखी वाचा-Chhagan Bhujbal : छगन भुजबळांचं मनोज जरांगेंना खुलं आव्हान; म्हणाले, “२८८ उमेदवार उभे…” पण पुन्हा काही तासांनी बिबट तिथून काही अंतरावर नांद्रे येथील रहिवाशी शेटे यांनी गावाकडे जात असताना रात्री अडीच वाजण्याच्या सुमारास दिसून आला. त्यांनी रस्त्यावरून जाणाऱ्या लोकांना या बाबत माहिती दिली व त्याचे मोबाईल मध्ये चित्रीकरण केले. त्यांना पाहून बिबट उसात निघून गेला. गेली ३ वर्षे सदर परिसरात त्याचा वावर दिसून आलेची माहिती वन विभाग कडून देण्यात आली आहे. तो कर्नाळ मधील ओढ्याच्या कडेने फिरती करत असल्याचे बऱ्याच वेळेस आढळून आले आहे. हा ओढा भोसे, कवठे, शिरगाव, कर्नाळ, नावरस वाडी, डिग्रज हद्दीच्या गावातून वाहत कृष्णेला मिळतो. ओढ्याच्या कडेने दाट झाडी आहे. वर्षभर ओढ्याला भरपूर पाणी असते. या कारणांनी बिबट बरेच दिवस याच भागात फिरती करताना दिसून आला आहे. त्याने आजुन कोणावर ही हल्ला केलेला नाही अथवा पाळीव जनावर पशू मारल्याची घटना निदर्शनास नाही आहे. परिसरातील नागरिकांना सावधगिरी बाळगावी असे आवाहन वन विभागाकडून करण्यात आले आहे.
