महाड नगरपालिका राडा प्रकरण, विकास गोगावले यांना जमीन मंजूर, महाड न्यायालयाचे आदेश

मुंबई उच्च न्यायालयाने गंभीर ताशेरे ओढल्यानंतर विकास गोगावले यांच्यासह शिवसेनेचे आठ तर राष्ट्रवादी काँग्रेसचे पाच असे एकूण १३ जण शुक्रवारी महाड पोलिसांसमोर हजर झाले. शुक्रवारी न्यायालयासमोर हजर केले असता न्यायालयाने त्यांना दोन दिवसांची पोलिस कोठडी सुनावली. आज या दोन्ही गटातील आरोपींना स्वतंत्रपणे न्यायालयासमोर हजर करण्यात आले. न्यायालयाने विकास गोगावले यांच्यासह शिवसेनेच्या आठ आरोपी कार्यकर्त्यांना जामीन मंजूर केला. तर राष्ट्रवादीच्या पाच आरोपी कार्यकर्त्यांना न्यायालयीन कोठडीचे आदेश दिले. त्यांना उद्या जामिनासाठी अर्ज करण्याचे आदेश न्यायालयाने दिले. शनिवारी सकाळी पोलिसाना शरण आलेला राष्ट्रवादी काँग्रेसचा सुशांत जाबरे पोलिस कोठडीत आहे.

शिवसेनेच्या आठ कार्यकर्त्यांना जामीन मंजूर होताच पोलिसांनी कायदेशीर प्रक्रिया पूर्ण करून सोडून दिले. यावेळी विकास गोगावले यांचे समर्थक, नातेवाईक, कार्यकर्ते यांनी न्यायालयाबाहेर गर्दी केली होती.

महाड नगर पालिका निवडणुकीच्या मतदाना दरम्यान २ डिसेंबर रोजी राष्ट्रवादी आणि शिवसेनेच्या कार्यकर्त्यांमध्ये जोरदार राडा झाला होता. त्यानंतर पोलिसांनी दोन्ही बाजूच्या कार्यकर्त्यांवर गुन्हा दाखल केला होता. तेंव्हापासून हे सर्व आरोपी फरार होते. त्यांनी जामिनासाठी मुंबई उच्च न्यायालयात जामिनासाठी अर्ज केला होता तो न्यायालयाने फेटाळून लावला होता. दरम्यान गुरुवारी उच्च न्यायालयाने या प्रकरणी सरकार आणि पोलिसांवर गंभीर ताशेरे ओढत मंत्री पुत्र विकास गोगावले यांना तातडीने हजर करण्याचे आदेश दिले.त्यानंतर दोन्ही बाजूचे आरोपी पोलिसांसमोर हजर झाले.