नवीन तुरुंग अधिनियम: कैद्यांसाठी मोबाईल बंदी, मदत करणाऱ्यांवरही कारवाई

राज्यातील कारागृहे, त्यांची कैद्यांच्या संख्येनुसारची वर्गवारी, सुधारसेवा, शिस्त, कैद्यांसाठी नियम, अधिकार व शिक्षा, तुरुंगात बेशिस्त वर्तन, काम नाकारणे, हाणामारी, भांडणे किंवा अन्य गैरकृत्य केल्यास शिक्षेच्या विविध तरतुदी नवीन अधिनियमात आहेत. पॅरोल किंवा अन्य रजांवर मुक्त असताना मुदतीत परत न आल्यास, न्यायालयात नेत असतानाचे नियम व ते न पाळणाऱ्यास शिक्षा, कैद्यांना तुरुंगात भोजन, अंथरुण, औषधांसह अन्य सवलती, त्यांचे अधिकार, नियमभंगासाठी शिक्षा, तुरुंग कर्मचाऱ्यांसाठी नियम, कारागृह व्यवस्थापन आदी १६ विविध बाबींविषयी या अधिनियमात तरतुदी करण्यात आल्या आहेत.

महिला, पुरूष कैद्यांबरोबरच तृतीयपंथी व दिव्यांग कैदी यांच्यासाठीही कारागृहात स्वतंत्र व्यवस्था असली पाहिजे, महिला कैद्यांबरोबर असलेल्या लहान मुलांसाठी आवश्यक सुविधा असाव्यात, महिला कैदी गरोदर असल्यास तिला आवश्यक वैद्यकीय सुविधा व आहार मिळावा, आदी तरतुदी विधेयकात आहेत. हे विधेयक गेल्यावर्षीही सादर झाले होते. पण नवीन केंद्रीय अधिनयम आल्याने आवश्यक दुरूस्त्यांनंतर ते नव्याने सादर झाले आहे.