महाराष्ट्र केसरी कुस्ती स्पर्धेची जोरदार तयारी सुरू

अहिल्यानगर येथे महाराष्ट्र राज्य कुस्तीगीर संघ यांच्या वतीने २ फेब्रुवारी रोजी महाराष्ट्र केसरी कुस्ती स्पर्धा संपन्न झाली होती. अंतिम कुस्ती स्पर्धेमध्ये निकालावरून ही स्पर्धा गाजली होती. अंतिम स्पर्धेच्या निकालानंतर कुस्ती क्षेत्रामध्ये त्याचे मोठे पडसाद आपल्याला पहावयास मिळाले. आणि यानंतरच रोहित पवार यांनी पुणे येथे पत्रकार परिषद घेऊन कर्जत येथे महाराष्ट्र कुस्तीगीर परिषद यांच्या वतीने पुन्हा महाराष्ट्र केसरी कुस्ती स्पर्धा भरवण्याची घोषणा केली होती.

दोन कुस्ती संघटना मधील संघर्ष

महाराष्ट्र कुस्तीगीर परिषद या संघटनेची सन १९५३ साधी कुस्ती महर्षी मामासाहेब मोहोळ यांनी स्थापना केली आहे. याच परिषदेच्या माध्यमातून देशामध्ये मानाची असणारी महाराष्ट्र केसरी कुस्ती स्पर्धा प्रत्येक वेळी भरवली गेली. व विजेत्या पहिलवानास चांदीची गदा देण्याची कुस्ती परिषदेची परंपरा आहे.

राज्यामध्ये महाराष्ट्र कुस्तीगीर संघ ही दोन वर्षांपूर्वी नवीन कुस्ती संघटना स्थापन झाली. या संघटनेला मान्यता देऊ नये यासाठी न्यायालयामध्ये संघर्ष दोन्ही कुस्ती संघटनांमध्ये सुरू होता. न्यायालयाने नुकताच काही दिवसांपूर्वीच महाराष्ट्र कुस्तीगीर संघाला देखील मान्यता दिली आहे यामुळे आणखीनच गोंधळ पहिलवानांच्या मनामध्ये निर्माण झाला आहे.

स्पर्धेत सहभागी झाल्यास कारवाईचा इशारा

दरम्यान कर्जत येथे होत असलेल्या महाराष्ट्र केसरी कुस्ती स्पर्धेमध्ये पैलवानांनी सहभागी होऊ नये , अन्यथा त्यांच्यावर कारवाई करू असा इशारा महाराष्ट्र कुस्तीगीर संघ यांच्या वतीने देण्यात आला आहे. यामुळे आता या स्पर्धेत किती पैलवान राज्यांमधून सहभागी होणार याविषयी उत्सुकता निर्माण झाली आहे.

१००० मल्ल सहभागी होणार संयोजकांचा दावा

या कुस्ती स्पर्धेमध्ये किमान १००० राज्यातील नामांकित पैलवान सहभागी होतील. कुस्तीगीर परिषद हीच अधिकृत संघटना आहे. या स्पर्धेतील सहभागी खेळाडूंना देश पातळीवर शासनाकडून विविध पुरस्कार देऊन सन्मानित करण्यात आले आहे. हीच अधिकृत आणि सर्वात जुनी संघटना आहेत असा दावा देखील या समितीच्या वतीने करण्यात आला आहे.
स्पर्धेची जोरदार तयारी

महाराष्ट्र केसरी कुस्ती स्पर्धा ही अतिशय मानाची कुस्ती स्पर्धा म्हणून ओळखली जाते. अहिल्या नगर जिल्ह्यातील कर्जत येथे प्रथमच एवढ्या मोठ्या पातळीवरील कुस्ती स्पर्धा आमदार रोहित पवार यांच्या पुढाकारातून होत आहे. या स्पर्धेच्या साठी आवश्यक असणारी सर्व तयारी सुरू आहे. यासाठी खास मैदान तयार करण्यात आले आहे. कर्जत येथील नगर रोडवरील दादा पाटील महाविद्यालयासमोरील मैदानामध्ये खास स्टेडियमची उभारणी करण्यात आली आहे. कुस्ती पाहण्यासाठी येणाऱ्या शौकिनांसाठी खास भव्य आणि मोठ्या अशा चार गॅलरी उभा करण्यात आलेले आहेत. या स्पर्धेसाठी उपस्थित असणाऱ्या सर्वच राजकीय नेत्यांसाठी दोन मोठे व्यासपीठ उभा करण्यात आलेले आहेत. उनापासून संरक्षण व्हावे यासाठी ये आच्छादित आहेत. याशिवाय या स्पर्धेसाठी गादी व मातीचे असे दोन प्रेक्षकांना सहज पाहता येतील अशी मैदान तयार करण्याची काम सुरू आहे. प्रेक्षक गॅलरी उभा राहिले असून, निमंत्रितांसाठी खास वातानुकलिक दोन मोठे व्यासपीठ उभा करण्यात आले आहेत. प्रत्यक्ष कुस्ती ज्या आखाड्यामध्ये होणार आहे त्यासाठी असणारी लाल माती आणून ती व्यवस्थित करून मैदान तयार करण्याचे काम अहोरात्र सुरू आहे. गादी वरील कुस्ती साठी मैदान तयार करण्याचे काम सुरू आहे .कुस्ती उशिरापर्यंत सुरू राहणार असल्यामुळे पल्ड् लाईटची व्यवस्था करण्याचे काम जोरात सुरू आहे.

आमदार रोहित पवार यांची कोणत्याही स्पर्धेसाठी किंवा कार्यक्रमासाठी अतिशय उत्कृष्ट असे व्यवस्थापन असते ते यावेळी देखील आपल्याला पाहावयास मिळणार आहे. स्पर्धेची जाहिरात करण्यासाठी पुरेशा यंत्रणा मतदारसंघासह राज्यामध्ये काम करत आहेत. या स्पर्धेसाठी वेगवेगळ्या समित्या स्थापन करण्यात आले असून त्यांच्या बैठका व तयारी याचा आढावा रोहित पवार रोज घेत आहेत. यामुळे अहिल्यानगर जिल्ह्यातच होत असणारी ही दुसरी महाराष्ट्र केसरी कुस्ती स्पर्धा मैदानावर तसेच मैदानाच्या बाहेर राजकीय आखाड्यावर देखील गाजणार हे निश्चित आहे.