Maharashtra Breaking News Updates: “अजितदादांना जोपर्यंत न्याय मिळत नाही, तोपर्यंत…” , युगेंद्र पवार यांची सोशल मीडियावर पोस्ट

"महाराष्ट्राचे उपमुख्यमंत्री स्व. अजितदादा पवार यांंच्या विमान अपघाताबद्दल महाराष्ट्रातील जनमानस शंका व्यक्त करीत आहे. राज्यातील एक मोठा नेता आणि जबाबदार लोकप्रतिनिधी ज्या पद्धतीने आपल्यातून निघून गेला याबाबत लोकांमध्ये शोकसंतप्त भावना आहे. यामुळेच या संपूर्ण प्रकरणाची सखोल आणि पारदर्शक चौकशी व्हावी ही जनतेची मागणी आहे. यासाठी ज्या घटनेत दादांना प्राण गमावावे लागले त्या घटनेतील व्हिएसआर ही विमान कंपनी आणि डीजीसीए यांच्यावर गुन्हे दाखल होणे अतिशय गरजेचे आहे. याबाबत आमदार रोहितदादा पवार हे गेली काही दिवसांपासून सातत्याने एफआयआर दाखल करण्याचा प्रयत्न करीत आहेत. परंतु पोलीस दबावाखाली असून ते एफआयआर दाखल करुन घेत नाहीत. पोलीसांनी एफआयआर दाखल करुन घ्यावा आणि लोकनेते स्व अजितदादा यांच्या मृत्यूस कारणीभूत असणाऱ्या घटकांवर कारवाई व्हावी यासाठी आज आमदार रोहितदादा पवार, राजेंद्रकाका पवार यांच्यासह मोठ्या संख्येने बारामतीकर उपस्थित होते."

"याप्रसंगी तेथील उपस्थित पोलीस अधिकाऱ्यांशी सविस्तर चर्चा केली. यासोबतच डीजीसीएच्या स्पेशल ऑडिट रिपोर्टनुसार बारामती पोलीसांनी योग्य ती कार्यवाही करावी, अशी मागणी केली. डीजीसीएच्या रिपोर्टनुसार क्रिमिनल नेगलिजेंसमुळे ( दुर्लक्षामुळे) म्हणजेच विमानाचा मेंटेनन्स न केल्यामुळे या सगळ्या गोष्टी घडल्या आहेत. त्यामुळे त्यानुसार गुन्हा दाखल झाला पाहिजे, हीच आमची आणि संपूर्ण महाराष्ट्राची मागणी आहे. या प्रकरणातील सत्य लवकरात लवकर समोर आले पाहिजे. अजितदादांना जोपर्यंत न्याय मिळत नाही, तोपर्यंत आम्ही शांत बसणार नाही, याची शासन तथा प्रशासनाने नोंद घ्यावी," अशी पोस्ट युगेंद्र पवार यांनी एक्सवर केली आहे.