Maharashtra Election Exit Poll Result Updates : महापालिका निवडणुकीच्या मतदानाची वेळ संपली ! Exit Polls काय सांगतात?

नाशिक महापालिकेच्या ३१ प्रभागात १२२ जागांसाठी सुरू असलेल्या मतदान प्रक्रियेत सकाळी साडेसात ते दुपारी साडेतीन या आठ तासांच्या कालावधीत ३९.६४ टक्के मतदान झाले. एकूण पाच लाख ३९ हजार ३४२ मतदारांनी मतदान केले. यामध्ये दोन लाख ८९ हजार ५९५ पुरूष तर दोन लाख ४९ हजार ७०९ महिला आणि ३९ तृतीय पंथीय मतदारांचा समावेश आहे.

मालेगाव : मालेगाव महापालिका निवडणुकीसाठी दुपारी साडेतीन वाजेपर्यंत ४६.१८ टक्के मतदान झाले आहे. सकाळी साडेसात वाजता मतदानास सुरुवात झाल्यानंतर पहिल्या दोन तासात म्हणजे साडेनऊ वाजेपर्यंत ८.९४ टक्के एवढे मतदान झाले होते. त्यानंतरच्या दोन तासात मतदानाचा वेग थोडासा वाढला. सकाळी साडेअकरा वाजेपर्यंत २० .९२ टक्के मतदान झाले. त्यानंतर दीड वाजेपर्यंत ३३.०५ व साडेतीन वाजेपर्यंत मतदानाची टक्केवारी ४६ वर गेली आहे. सर्वच पक्ष व उमेदवारांकडून मतदानाचा टक्का वाढविण्यासाठी प्रयत्न केला जात आहे. त्यामुळे शेवटच्या दोन तासांत आणखी किती मतदान होईल, याबद्दल उत्सुकता निर्माण झाली आहे. प्रभाग क्रमांक ९ एका मतदान केंद्रावर बोगस मतदान करण्याचा प्रयत्न जागृत नागरिकांनी उधळून लावला. हा प्रकार लक्षात येताच बोगस मतदान करण्याच्या प्रयत्नात असलेल्या व्यक्तीने मतदान न करता केंद्राच्या ठिकाणाहून धूम ठोकल्याचे स्थानिकांनी सांगितले. दरम्यान,मतदार याद्यांमधील घोळामुळे काही मतदारांना मनस्ताप सहन करावा लागला. एकाच कुटुंबातील काही सदस्यांची नावे एका प्रभागात तर काहींची नावे दुसऱ्या प्रभागात असल्याची अनेक कुटुंबांना प्रचिती आली. त्यामुळे मतदान करण्यासाठी त्यांच्यावर धावपळ करण्याची वेळ आली. या घोळामुळे अनेक मतदारांकडून रोष प्रकट करण्यात येत आहे.

Jalgaon Corporation Voting Live Updates: जळगाव शहरातील महानगरपालिकेच्या निवडणुकीदरम्यान सकाळी ०७.३० ते दुपारी ०३.३० वाजे दरम्यान सरासरी ३४.२७ टक्के मतदान झाल्याची नोंद घेण्यात आली. एकूण एक लाख ५० हजार २९९ मतदारांनी आठ तासांत मतदानाचा हक्क बजावला, ज्यामध्ये पुरूष मतदारांची संख्या ७९ हजार ७२७ आणि स्त्री मतदारांची संख्या ७० हजार ५७२ इतकी आहे.