Maharashtra Politics Crisis Updates, 11 January 2023 : मागील काही दिवसांपासून राज्यातील आमदारांच्या अपघाताची मालिकाच सुरु असल्याचं पाहायला मिळत आहे. आमदार जयकुमार गोरे, आमदार धनंजय मुंडे, आमदार योगेश कदम यांच्या कारचा अपघात झाला होता. त्यातच आता प्रहार संघटनेचे नेते, माजी मंत्री बच्चू कडू यांचा अपघात झाला आहे. रस्ता ओलांडताना दुचाकीने बच्चू कडू यांना धडक दिली आहे. या अपघातात बच्चू कडू गंभीर जखमी झाले आहेत. दरम्यान, अंमलबजावणी संचालनालयाने आज सकाळी राष्ट्रवादीचे नेते आणि माजी मंत्री हसन मुश्रीफ यांच्या पुणे आणि कागल येथील घरांवर छापे टाकले आहेत. यावरून राज्यातील राजकीय वातावरण पुन्हा एकदा तापण्याची शक्यता आहे. या कारवाईनंतर राष्ट्रवादी काँग्रेससह शिवसेनेही संतप्त प्रतिक्रिया दिली आहे. हा विषय आज दिवसभर चर्चेत राहण्याची शक्यता आहे.