Ajit Pawar Plane Crash Updates : अजित पवारांच्या पार्थिवावर आज होणार अंत्यसंस्कार; कार्यकर्ते, नेत्यांना अश्रू अनावर

कराड : अजित पवार हे स्पष्टवक्ते, ‘ऑन द स्पॉट’ निर्णय घेणारे नेते. जे काम होऊ शकत नाही, ते नियमात बसत नसल्याचे स्पष्टपणे सांगणारे नेतृत्व. असा स्पष्टवक्तेपणाचा आवाज कायमचा हरपल्याचे दु:ख राज्याचे पर्यटनमंत्री शंभूराज देसाई यांनी व्यक्त केले.अजित पवार यांचे विमान अपघाती निधन या वृत्तावर विश्वासच बसला नाही. त्यांचे अशा प्रकारे अचानक जाणे, ही अत्यंत धक्कादायक, मनाला चटका लावणारी आणि दुःखद घटना असल्याचे देसाई म्हणाले.

राजकारणात इतक्या स्पष्टपणे बोलणारे नेते फार कमी आहेत. एखादे काम होणार नसल्याचे सांगितल्याने संबंधित व्यक्तीला क्षणिक दुःख होईल, मात्र त्यांना अडचण स्पष्ट समजली पाहिजे, ही त्यांची ठाम भूमिका होती. राजकारण, समाजकारण आणि शासनात काम करताना त्यांनी ही परखड भूमिका सातत्याने जपली.

सातारचे ते सुरुवातीला पालकमंत्री असताना, मी आमदार नव्हतो, तरीही आमची मैत्री होती. राजकारणापलीकडची मैत्री जपणारा नेता म्हणून ते कायम स्मरणात राहतील. मला त्यांच्यासोबत अडीच वर्षे राज्यमंत्री म्हणून काम करण्याची संधी मिळाली. ‘महाविकास आघाडी’च्या काळात ते वित्तमंत्री व उपमुख्यमंत्री असताना मी वित्त खात्याचा राज्यमंत्री होतो. विधानपरिषदेत आम्ही तीनदा अर्थसंकल्प मांडला. अर्थसंकल्प तयार करताना राज्याचे हित जपत सर्व क्षेत्रांना न्याय देण्याची ठाम भूमिका मला त्यांचा सहकारी म्हणून नेहमी अनुभवता आली.

ज्येष्ठ नेते शरद यांनी अजित पवार यांच्या अपघाती निधनानंतर ‘हा निव्वळ अपघात असून, यात राजकारण नाही,’ अशी प्रतिक्रिया दिली. ...सविस्तर वाचा

कराड : अजित पवार यांच्या इतका अत्यंत शिस्तबद्ध आणि कार्यक्षम नेता क्वचितच पाहायला मिळतो. अजितदादांचे असे अकाली जाणे, हे केवळ महाराष्ट्राचे नव्हे; तर संपूर्ण देशाचे मोठे नुकसान असल्याचे माजी मुख्यमंत्री पृथ्वीराज चव्हाण यांनी आपल्या शोकसंदेशात म्हटले आहे.

महाराष्ट्राचे उपमुख्यमंत्री अजित पवार यांच्या विमान दुर्घटनेतील निधनाची बातमी अत्यंत दुःखद व धक्कादायक असल्याचे ते म्हणाले. अलीकडेच राज्यात नगरपालिका व महापालिका निवडणुका पार पडल्या. महाराष्ट्राचा अर्थसंकल्प सादर होणार होता. ग्रामीण भागात जिल्हा परिषदेचा निवडणूक प्रचार सुरू होता. अशा अत्यंत महत्त्वाच्या काळात ते सातत्याने राज्याच्या हितासाठी कार्यरत होते. याच दरम्यान, ही दुर्दैवी दुर्घटना घडल्याचे दु:ख चव्हाण यांनी व्यक्त केले.

स्थानिक स्वराज्य संस्थांच्या निवडणुकीतील आपल्या पक्षाच्या प्रचाराचा प्रारंभ ते बारामतीत करणार होते. परंतु, इथे त्यांचे विमान उतरण्यापूर्वीच हा दुदैवी अपघात झाला. मी २०१० साली मुख्यमंत्री म्हणून प्रशासनाची जबाबदारी स्वीकारली. तेव्हा अजित पवार उपमुख्यमंत्री झाले. जवळपास चार वर्षे आम्ही एकत्रितपणे महाराष्ट्राचे नेतृत्व केले आणि जनहिताचे अनेक महत्त्वाचे निर्णय घेतले. आमच्यात काही मतभेदही झाले, एका टप्प्यावर ते नाराज होऊन आपल्या पदाचा राजीनामा देऊन बाहेर गेले होते. मात्र, मी त्यांना समजावून पुन्हा मंत्रिमंडळात सहभागी करून घेतले. त्या काळातही त्यांच्याकडे वित्त विभागाची जबाबदारी होती आणि आजही तीच जबाबदारी त्यांच्या खांद्यावर होती. अजित पवार हे अर्थसंकल्प सादर करण्यात अत्यंत कुशल होते. महाराष्ट्राची अर्थव्यवस्था, कृषी क्षेत्र आणि सहकार क्षेत्र यांची त्यांना सखोल जाण होती. राज्याचे नेतृत्व करण्याची त्यांच्यात अपार क्षमता होती असे चव्हाण यांनी सांगितले.

अजित पवार यांच्या जाण्याने महाराष्ट्र राज्याला, राष्ट्रवादी काँग्रेस पक्षाला आणि देशाच्या राजकारणाला मोठा धक्का बसला आहे. पवार कुटुंबीयांप्रती मी माझ्या तीव्र संवेदना व्यक्त करतो असे पृथ्वीराज चव्हाण यांनी सांगितले.