Maharashtra News : “राहुल गांधींच्या नेतृत्वाखाली ‘इंडिया’ निवडणुका जिंकत नसल्याचा शरद पवारांकडून ठपका”, उदय सामंतांचं वक्तव्य

ममता बॅनर्जींकडे इंडिया आघाडीचं नेतृत्व दिलं पाहिजे असं शरद पवार म्हणाले होते हा खरा काँग्रेसचा अपमान आहे, अशा शब्दांत आमदार उदय सामंत यांनी शरद पवारांवर टीका केली आहे. राहुल गांधी यांच्या नेतृत्वाखाली निवडणुका यशस्वी होत नाहीत हा ठपका शरद पवारांनी व इतर नेत्यांनी ठेवला आहे.हा काँग्रेसचा झालेला अपमान आहे त्यामुळे आम्ही या संदर्भात काय बोलणार. राहुल गांधी यांचे नेतृत्व काढून ते आता जर ममता बॅनर्जी यांच्याकडे येणार असेल तर राहुल गांधी यांचं नेतृत्व कमकुवत आहे असं महाविकास आघाडी सांगतेय, असंही सामंत म्हणाले.

शिवसेनेचे (ठाकरे) खासदार संजय राऊत यांनी काही वेळापूर्वी दिल्ली येथे प्रसारमाध्यमांशी बातचीत केली. यावेळी ते म्हणाले, बांगलादेशमध्ये हिंदूंवर अनन्वित अत्याचार होत आहेत. तिथल्या हिंदूंसाठी लढणारे, त्यांच्या आंदोलनाचं नेतृत्व करणारे चिन्मय दास यांना तिथल्या सरकारने तुरुंगात डांबून ठेवलं आहे. हिंदूंची बाजू लावून धरतील अशा वकिलांच्या हत्या होत आहेत. बांगलादेशमध्ये असं सगळं घडत असताना स्वतःला हिंदूंचे नेते संबोधणाऱ्या पंतप्रधान नरेंद्र मोदी यांना काहीच कसं वाटत नाही? तिथली परिस्थिती पाहून मोदी व अमित शाह यांचं मन विचलित होत नसेल, केवळ सचिव स्तरावरच या चर्चा सुरू असतील तर मला वाटतं की मोदी आणि शहांची हिंदूंबाबत केवळ भोंदूगिरी चालू आहे. ते हिंदूंबद्दल जे काही बोलत आहेत ते ढोंग आहे. केवळ मतांसाठी हिंदूंच्या नावाचा गजर करत असतात. अशीच घटना पाकिस्तानात घडली असती तर एव्हाना नरेंद्र मोदी यांनी इंडिया गेटवर उभं राहून भाषण केलं असतं. पाकिस्तानातून घुसून मारू, अशी भाषा केली असती. वेगवेगळ्या घोषणा करून वातावरण निर्मिती केली असती. परंतु, आता निवडणुका नाहीत आणि मोदी शहांना बांगलादेशमध्ये निवडणूक लढायची नाही. म्हणून ते सगळे स्वस्थ बसले आहेत. त्यामुळे हिंदू मेला तरी त्यांना काही फरक पडत नाही. बांगलादेशमध्ये निवडणुका लढायच्या असता किंवा भारतात निवडणुका असत्या तर मोदींनी बांगलादेशमधील हिंदूंसाठी काहीतरी केलं असतं.