Maharashtra News Today, 26 August 2022: राज्यातील सत्तासंघर्ष आणि शिवसेनेतील फुटीबाबत गुरुवारी सुनावणी होऊ शकली नसून, घटनापीठाच्या स्थापनेची प्रतीक्षा कायम आहे. याबाबत लवकरात लवकर निर्णय घेण्याची विनंती मावळते सरन्यायाधीश एन. व्ही. रमणा यांच्यापुढे शुक्रवारी किंवा नियोजित सरन्यायाधीश उमेश लळित यांच्यापुढे शिवसेना सोमवारी करणार आहे. आगामी महानगरपालिकांसह स्थानिक स्वराज्य संस्थांच्या निवडणुकांच्या पार्श्वभूमीवर विविध प्रवर्गांना खूश करण्यावर मुख्यमंत्री एकनाथ शिंदे यांनी विधानसभेच्या पावसाळी अधिवेशनाच्या शेवटच्या दिवशी विविध घोषणा केल्या. सुमारे ७५ हजार सरकारी पदे भरण्याची घोषणा करून बेरोजगार किंवा तरुण वर्गाला मुख्यमंत्र्यांनी आश्वस्त केले. तसेच उल्हासनगरातील बांधकामे अधिकृत करण्याचा निर्णयही राज्य सरकारने घेतला आहे.
