Maharashtra News Updates: मंत्री आशिष शेलारांनी मोदींच्या आवाहनाची टिंगल केली? सुषमा अंधारेंनी शेअर केलेला Video चर्चेत!

भाईंदर : मिरा-भाईंदर महापालिकेच्या उत्तन धावगी येथील घनकचरा प्रकल्पात साठलेल्या कचऱ्याच्या डोंगराला गुरुवारी सकाळी भीषण आग लागली. आगीमुळे परिसरात घातक धुराचे लोट पसरले असून, वारंवार लागणाऱ्या आगींमुळे नागरिकांमध्ये संताप व्यक्त केला जात आहे.

उत्तनच्या धावगी येथे शासनाकडून घनकचरा प्रकल्पासाठी मिरा-भाईंदर महापालिकेला मोफत जागा देण्यात आली आहे. या ठिकाणी शहरातील कचरा आणून त्यावर प्रक्रिया केली जाते. मात्र, मधल्या काळात स्थानिकांनी या प्रकल्पाला विरोध केल्यामुळे प्रक्रिया बंद करण्यात आली होती. परिणामी, कोणतीही प्रक्रिया न करता येथे मोठ्या प्रमाणात कचरा टाकला जात असल्याने कचऱ्याचे प्रचंड डोंगर उभे राहिले आहेत.

दरम्यान, अशाच साचलेल्या कचऱ्याच्या ढिगाऱ्याला गुरुवारी सकाळी भीषण आग लागली. आग मोठ्या प्रमाणात भडकली असल्याने धुराचे प्रचंड लोट उसळले. घटनास्थळी अग्निशमन दलाची एक गाडी आधीपासूनच तैनात होती. मात्र, आगीची तीव्रता वाढल्याने प्रशासनाने तातडीने आणखी गाड्या घटनास्थळी रवाना केल्या. बराच वेळ प्रयत्न केल्यानंतर आग आटोक्यात आणण्यात यश आले. मात्र उष्णतेचे प्रमाण अधिक असल्यामुळे आग पुन्हा भडकण्याची शक्यता लक्षात घेऊन अग्निशमन दलाकडून सतत पाण्याचा मारा केला जात असल्याची माहिती प्रशासनाकडून देण्यात आली.